Amás, la organización nacionaliega entama, comu ca añu, un homenaxe nel cimenteriu de Deva, esti sábadu 30 a les 13:00 hores, nel que se remembrará la vida y obra d’Andrés Solar, un home que na so curtia vida fexho un perimportante llabor, tanto na lliteratura comu na hestoria política y llingüística d’Asturies.
Nesta ocasión Andecha quier dir un pasu más allá y amás del homenaxe y la ufrienda floral del día 30 llanza un retu a tolos asturianos pa que demientres estos díes espublicen, llean o musiquen nes sos redes sociales la obra escrita d’Andrés Solar, col Hastag #AndresSolar, pa visibilizar con ello al poeta nacional asturianu nel 39 cabudañu del so fallecimientu.
La obra d’Andrés Solar ye abondosa, fonda y cargada de conteníu, polo que consideren perimportante seguir dando voz a les sos pallabres, espardiéndoles peles redes en reconocimientu y alcordanza. Traxicamente fináu con namás 29 años, na so curtia vida Andrés Solar amosó una capacidá creativa, una claridá mental y una capacidá de compromisu pa cola causa asturiana estraordinaries.
Amás de poeta, Andrés fore miembru fundaor del Ensame Nacionalista Astur, presentándose por esi partíu como candidatu a la Xunta Xeneral, foi profesor de llingua asturiana na UP de Xixón, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi ayalgueru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana, siendo en tou momentu un referente pola so implicación, capacidá de trabayu y cualidaes presonales.
Collaborando con esa aniciativa, apurrimos dellos poemes pa que los nuesos llectores puedan participar na idega. Alcordaivos del #AndresSolar.
Alberto Rodríguez
This work is licensed under a Creative Commons Attribution 4.0 International License.
