Ta acabante d’asoleyase’l llibru “El Celtismu Musical Asturianu”, editáu pola Fundación Belenos a comuña con @GoxeProd, volume que recueye les actes del XX Seminariu d’Estudios Asturianos de 2019
Ya podemos alcontrar meyores llibreríes del país el llibru El Celtismu Musical Asturianu, una obra imprescindible pa comprender y conocer esti movimientu musical, el más relevante de la hestoria musical recién n’Asturies. Coordináu por Ignaciu Llope, les más de 200 páxines recueyen les ponencies del XX Seminariu d’Estudios Asturianos de la Fundación Belenos, celebráu en La Puela (Ayande) en payares del 2019.
Pente los interesantes artículos d’esti llibru destaquen «¿Dexó buelga’l celtismu na música asturiana?» roblau pol Director del Muséu Internacional de la Gaita, Alfonso Fernández, «El celtismu musical asturianu: un averamientu críticu» d’Ignaciu Llope, «Llembrances d’un camín iniciáticu. Notes sobre los comienzos del folk y l’interceltismu nos años 80 del sieglu XX», escritu pol ex Director Xeneral del Festival Intercélticu de Lorient, Lisardo Lombardía, «Diálogos ente un bouzouki y una pandereta: acordes de nostomanía y el poder de percutir piel» (Leticia Baselgas y Rubén Bada, componentes de L-R) y «Rock’n’gaita: cuando los celtes empuñaron les guitarres eléctriques», obra del músicu vocalista de Dixebra, Xune Elipe. Tamién se recueyen artículos de Fe Santoveña sobro’l Memorial Remis Ovalle, d’Iñaki Santianes acerca’l Festival Intercélticu de Lorient y l’artículu sobro’l vigulín n’Asturies de Dolfu R. Fernández.
L’antoxana del llibru ta a cargu’l músicu gallegu Carlos Núñez, encargándose del Piesllu l’escritor y académicu Roberto González-Quevedo.
El llibru ya pue mercase’n llibreries y a traviés de la páxina web de musicasturiana.com, a un preciu de 25 euros.
Nel Dos Santos
This work is licensed under a Creative Commons Attribution 4.0 International License.
