El xueves 14 n’Uviéu ya’l vienres 15 en Xixón, n’ambos casos frente la estación d’ALSA, tendrán llugar dos nueves concentraciones
El despidu d’un trabayador y delegáu sindical na empresa ALSA, motiváu por defendese d’una agresión sufrida nel so puestu trabayu per parte d’un pasaxeru, ta teniendo rempuesta por parte los compañeros del perxudicáu y de la sociedá asturiana, que se solidariza col so casu.
Amás de la readmisión del afeutau, los trabayadores desixen que se ponga en marcha un protocolu d’actuación pa casos asemeyaos, reforciándose la seguridá nos autobuses ya estaciones.
Les primeres movilizaciones tuvieron llugar el vienres un ya’l martes 5 d’avientu, acomuñándose más d’un cientu de persones que torgaron la salida de los autobuses de la estación de Xixón. La prósima concentración treslládase a la estación d’autobuses d’Uviéu y sedrá’l xueves 14 d’avientu, pente les tres y les siete la tardi. Al díe viniente, 15 d’avientu, de 14:45 h. a 19:00 h. la solidaridá pa col trabayador tien una cita frente a la estación d’Alsa de Xixón.
Los horarios de les concentraciones son amplios porque nun se pretende la semeya nin l’actu puntual, sinón entorpecer con elles el normal desendolcu de los viaxes d’ALSA, perxudicando económicamente a la empresa pa forciar la realmisión del despidíu.
Nel Dos Santos
This work is licensed under a Creative Commons Attribution 4.0 International License.
