Mañana martes, 5 d’avientu, a les 19:00 h., na entrada’l centru comercial de Los Fresnos de Xixón, Asturies Insumisa entama un actu reivindicativu pa denunciar l’eleváu preciu de los productos que componen la cesta la compra y esixir que s’intervengan los precios d’estos productos, de manera qu’una alimentación afayadiza seya asequible pa toes y toos
La plataforma revindicativa entama con esta movilización una campaña de denuncia y concienciación sobre la necesidá d’intervenir p’asegurar qu’alimentos y vivienda tean al algame de tolos asutrianos. “El costu la vivienda y la carestía la vida estrangulen la economía de la mayor parte’l pueblu asturianu” aporfien, recalcando la urxencia d’intervenir los precios, tantu de la vivienda comu de la enerxía y los bienes básicos de consumu, pa garantizar unes condiciones de vida xustes.
Pa ello, concreten, ye necesario frenar les xubíes hipotecaries y topar los precios de los alquileres p’algamar una vivienda asequible al mesmu tiempu que tien d’asegurase que l’accesu a una alimentación afayadi nun se torne nun lluxu pa una gran parte la población asturiana, mientres les empreses distribuidores y grandes superficies amontonen beneficios “Fai falta que los ricos seyan menos ricos y los probes, menos probes”.
La de mañana sedrá la primera d’una riestra d’aiciones d’espardimientu y vindicación cientraes na carestía de la vida. A les siete la tardi, delantre’l C.C. Los Fresnos.
Nel Dos Santos
This work is licensed under a Creative Commons Attribution 4.0 International License.
