Asturies tornará a reclamar los drechos de Palestina y a desixir la fin del xenocidiu, nesta ocasión peles cais d’Uviéu, nuna concentración que saldrá a les siete la tardi de la Plaza d’América
Dende’l recrudecimientu de los ataques a la Franxa de Gaza, el Pueblu Asturianu lleva dellos manifestamientos y concentraciones colos que, amás d’amosar la so solidaridá, desixe a los sos representantes que tomen midies pa defender publicamente la causa palestina y reclamar la intervención internacional ante la masacre
Pesi a la tregua d’estos díes, na qu’Israel lliberó a dos muyeres y trenta rapacinos, l’Estáu Israelí dexó ya claro que nun piensa allargar la mesma más d’unos díes, lo xusto pa conseguir l’ntercambiu de rehenes, previéndose l’aniciu de los ataques darréu depués de dos dies.
El comité de Solidaridá cola causa Árabe, convocantes del manifestamientu, remembra que son ya cerca de cinco mil los neños y neñes asesinaos en menos de dos meses, que se sumen a otros cuasi dos mil desapaecios pente los escombros, nun conflictu nel que’l 75 por cientu de les víctimes son muyeres y reciella.
Amás de les muertes, hai 1’6 millones de persones desplazaes que perdieron el so llar, el 58% de les viviendes de la Franxa tan baltaes, 278 escueles y 26 de los 35 hospitales foron bombardeaos y los que queden en pie nun tienen medios colos que furrular, nin personal, una bones son cientos los miembros del personal de salú asesinaos, asina comu personal de defensa civil y rescate.
Alrodiu d’807.000 persones continúen viviendo na estrozada Franxa de Gaza y de nun ponese medios pa protexelos, tienen poques posibilidaes de sobrovivir.
Los asturianos súmense esta tardi a la reclamación que resuena en tolos pueblos d’Europa reclamando a los sos gobernantes la so intervención pa frenar esti xenocidiu.
Alberto Rodríguez
This work is licensed under a Creative Commons Attribution 4.0 International License.
