Bonos díes, bona xente.

Alborecemos col cielu cubierto ya con unes temperatures que tan alrodiu de los 13ºC, rexistrándose nel puirtu Payares 3,5ºC.

Güei vamos tener el cielu mui nuboso pero sin malpenes precipitaciones que llegarán al escurecer de la mano d’un frente atlánticu , dexándonos les precipitaciones más abondoses na metá ocidental d’Asturies. Les temperatures camudarán poco y l’aire gallegu pue soplar molestu en puntos de la costa y zones altes de la cordelera.

El prósimu riscar va tar pasáu per agua y quizás tamién l’alborada pero durante la mañana van remitir les precipitaciones, abriranse dellos claros y l’aire ábrigu fadrá subir les temperatures , sicasí na fastera más surocidental d’Asturies tará más nuboso y tendrán dalguna precipitación por retención durante tol día. Tamién a destacar el vientu que pue soplar con fuercia en zones altes de montaña y en puntos del llitoral.

El domingo tará más seliquino anque l’aire ábrigu seguirá soplando molestu en zones altes ya en puntos de la costa, siendo sele nel restu col cielu nuboso y temperatures que puen averase a los 20ºC de másima.

Paez qu’hasta’l miércoles seguiremos baxo esta situación de cielu nuboso, dalguna gotera y temperatures suaves, tendiendo a baxar y normalizase les temperatures a partir del xueves pero esto yá lu diremos viendo.

Que pasési un bon vienres collacies ya collacios.