La Conseyería de Transición Ecolóxica, Industria y Desendolcu Económicu d’Asturies acaba d’autorizar la instalación d’un nuevu parque eólicu na Reserva de la Biosfera del ríu Eo, Ozcos y Tierra de Burón. Cuasi al tiempu, el Principáu abre’l trámite pa dar el permisu ambiental a la planta de pirólisis de Xixón
El parque Eólicu Sierra d’Eirúa va instalase’n Taramundi y va tar formáu por 5 aeroxeneradores de 5.000 kW, con una llínea d’evacuación aérea asociada de 13.972 metros; va tar parcialmente allugáu dientro de la reserva de la biosfera, afectando a los espacios naturales y a la parte de especial protección comuñal.Na actual Reserva de la Biosfera yá tán funcionando 5 parques eólicos (Candal, Chao das Grallas, Bobia, Villanueva, A Xunqueira) hai 5 autorizaos (Vientu Castelo, Folgueiras, Chao Gran,Santalla y Pousadoiro) hai otros 14 parques proxectaos y namás 1 paralizáu, ésti caberu gracies a la firmeza del conceyu Taramundi.
Per otru llau, la Dirección Xeneral de calidá Ambiental abrió la fase d’información pública previa a la concesión de l’autorización ambiental integrada de la instalación d’una planta de reciclax químicu de plásticos nos muelles de l’ampliación del puertu d’El Musel, que s’afitaría n’una parcela de 38.657 metros cuadraos, xusto a los pies del Cabu Torres.
En dambos casos les consecuencies ambientales son llacerioses y l’oposición de los vecinos de la zona manifiesto y contundente, cuestiones que nun esmolecen n’absolutu a un gobiernu centráu en satisfaer les demandes empresariales perriba los intereses de la población asturiana.
Redaición InfoAsturies
This work is licensed under a Creative Commons Attribution 4.0 International License.
