Too a puntu pa esfrutar FolkAyer

25 Ochobre, 2023

FolkAyer ye la evolución de L’Alcuentru Folclóricu n’Ayer, qu’algama esti añu la so novena edición, los díes 27, 28 y 29 d’ochobre en Morea

El nuevu formatu d’esti eventu acomuña actuaciones de bandes folk asturianes, bretones y escoceses, un alcuentru de bandes de gaites, conciertos d’ asturianada, mercáu celta, taller de baille y gastronomía. Pola lluvia nun hai d’esmolecese, cuntarán con una carpa, allugada nel patiu’l Colexu Públicu de Morea, amás d’un serviciu d’autobuses ente Mieres, Morea y Felechosa tola tarde y nueche pa facilitar el tresporte.

La folixa entama’l vienres 27 a les 17h, cola apertura’l Mercáu Celta qu’a lo llargo del fin de selmana va ufrir artesanía, puestos de comida y actividaes pa la reciella. A les 19.30h sedrá’l taller de baille astur-bretón y a les 21.30h habrá un desfile con antorches que va dir dende’l campu Morea hasta la carpa’l festival. A les 22.30h entamen los conciertos cola formación asturbretona La Banda Latira, y los grupos folk Alienda (Asturies) y Startijenn (Breizh)

El sábadu 28 ye l’Alcuentru de Bandes de Gaites que va entamar con un pasucais a les 16.30h, darréu del qu’actuarán la Banda Gaites Villaviciosa-El Gaitero, la Banda Gaites Castrillón, la Escola de Gaitas de Ortigueira, la Banda Gaites Conceyu Llangréu y la Banda Gaites Escolinos d’El Gumial. A les 22.30h entamen los conciertos, cola participación de la Banda Gaites El Gumial -coorganizadora del festival-, el grupu de música tradicional asturiana fusionada Algaire y los irlandeses Elephant Sessions.

El caberu día va haber una xinta asturiana fecha pola Escuela d’Hostelería d’Ayer y una amuesa de tonada, a les 18h, na que participen los intérpretes Álvaro Fernández , Liliana Castañón y Paula Prieto y el gaiteru Fonsu Les Regueres.

Susana Sela