la Xunta de Galicia vien d’ufrir un alcuerdu que permita que los sos servicios sanitarios presten atención a vecinos pertenecientes al conceyu d’Ibias, más en concretu, a la parroquia de los Coutos. Con elli, pasaríen a depender del Cientru de Salú de Navia de Suarna, a 26 menutos, en llugar d’a San Antolín d’Ibias, a 45.

Los beneficios pa la población son nidios, los beneficios pa Galicia, qu’amplía la so aria d’influyencia afondando les polítiques de galleguización de la zona llende con Asturies aniciaes na dómina de Fraga, tamién. Ye d’esperar que’l Principado, con tal de nun poner en furrulamientu un necesariu nuevu Cientru de Salú na fastera que permita una atención afayaiza pa los vecinos de la fastera, aceute esta intromisión antroxada de caridá por parte de la Xunta. Toos contentos y Asturies amenorgada.

El conselleiro de Sanidá, Julio García Comesaña, aconceyó esta selmana nel Hospital de Lugo cola alcaldesa d’Ibias, Gemma Álvarez Cereigido, pa tresllada-y la ufierta de la Xunta de prestar asistencia sanitaria a la población de los Coutos.El gobiernu gallegu ta esperando pola conformidá del asturianu pa entamar la tramitación d’esti conveniu, que requier d’un trámite por parte d’ambes administraciones y ser remitíu al Senáu pa la so autorización, ya que vulnera les competencies territoriales asturianes.