Les trabayaores del Serviciu d’Aida a Domiciliu (S.A.D.) continúen na so llucha por unes condiciones de trabayu dignes y la remunicipalización del serviciu
Güei a les cincu la tardi hai una cita delantre la Gota Llechi, en Xixón, p’acompangar nes sos xustes reclamaciones a les trabayaores del S.A.D.. Sedrá a les cincu la tardi y na concentración tornará a reclamase’l fin de la precariedá llaboral que carecen, asina comu condiciones que permitan una meyora nel serviciu qu’ufren. La evaluación de riesgos llaborales, la remunicipalización del SAD, el reconocimientu de les enfermedaes profesionales o la redución de la edá de xubilación son dalgunes de les desixencies del coleutivu.
Sabiendo que’l d’Atención a Domiciliu ye un serviciu qu’afeuta o afeutará a tola población, especialmente con una población tan avieyada comu l’asturiana, llamen a toos y a toes a participar nesta concentración, faciendo visible’l sofitu de los asturianos nel so conflictu.
Redaición InfoAsturies
This work is licensed under a Creative Commons Attribution 4.0 International License.
