Cinco colexos de la Comarca la Sidra participaron nos talleres sidreros de Sidrocoles. Amás, dientro de la programación del Trasiegu Fest, tuvieron llugar dellos alderiques sobro la sidre dende estremaos puntos de vista
Cabranes, Cecea, Martimporra, Colunga y Sariegu, toos ellos pueblos fondamente sidreros, foron l’escenariu d’unos Sidrocoles de munchu nivel, onde dellos de los rapacinos faen d’avezu sidre en casa o tienen pumaraes, de manera que, amás de vivir una prestosa esperiencia y pasar una xornada llectiva perespecial, pudieron poner en valir y compartir pente ellos conocimientos alquirios al traviés de los sos pas, güelos o vecinos. “Aquellos que faen sidre’n casa perciben por primer vegá el facer sidre comu daqué que mola dientro l’ámbetu académicu. Salen arguyosos de la so tradición; y los que nun lo faen, van pa casa con ganes d’ello” declara Nel DS, un de los monitores de los Sidrocoles.
La temporada de mayar propiamente dicha entama a finales del mes que vien, y pa entos los talleres sidreros Sidrocoles cuenten con visitar colexos de toa Asturies faciendo sidre col so llagarín portatil. Nesti casu, l’actividá ensiértase dientro del Trasiegu Fest, el Festival de la Cultura Sidrera Contemporanea, que lleva tola selmana cellebrando meses reondes alrodiu la sidre y que tendrá los sos díis grandes esti fin de selmana, con una bayurosa programación musical y cultural.
Susana Sela
This work is licensed under a Creative Commons Attribution 4.0 International License.
