Los compañeros de coalición d’Andecha Astur en ‘Agora Repúbliques’ protagonizaron la única intervención nel Congresu español denunciando la situación del asturianu -y del aragonés-, onde les llingües oficiales dan un reblau p’allantre, mentes l’asturianu sigue reculando.

Reproducimos el comunicáu d’Andecha Astur:

“Una vuelta más, EH Bildu, compañeros de coalición d’Andecha Astur en ‘Agora Repúbliques’, asumen la defensa del asturianu y d’Asturies énte’l silenciu cómpliz de los diputaos ‘asturianos’

L’importante pasu algamáu pudiéndose usar les llingües oficiales nel Congresu español, supón de toes toes otru recular del asturianu que queda como una llingua de segunda frente al restu de los idiomes del Estáu.

Énte esta rialidá, y mentes los diputaos ‘asturianos’ achanten o pretenden vender como un pasu allantre la precaria posibilidá de poder usar l’asturianu nel Congresu español, la diputada d’EH Bildu nel Congresu, Mertxe Aizpurúa torna a defender la dignidá d’Asturies reivindicando la oficialidá de la nuesa llingua nacional y pidiendo pa ella los mesmos drechos que pal restu de les llingües del Estáu.

Una vuelta más, son los compañeros de coalición d’Andecha Astur los que dan la cara por Asturies, y una vuelta más los diputaos asturianos –de tol arcu políticu- tornen a quedar como lo que son, una sucursal sumisa y servil de los sos amos de Madrid.

Ello asina, dende Andecha Astur tornamos a agradecer a los compañeros d’EH-Bildu la so solidaridá, y perafitámosmos na necesidá de siguir puxando pol país tantu dientru como fuera de les nueses llendes”

This work is licensed under a Creative Commons Attribution 4.0 International License.