Alcontrar soluciones pal Alzheimer ye perimportante con una población tan avieyao comu l’asturiana
Del 8 al 11 payares, el Palaciu Congresos de Xixón va abellugar el X Congresu Estatal d’Alzheimer. Convocáu pola Confederación Española d’Asociaciones de Familiares de Persones con Alzheimer y otres Demencies (CEAFA), esti simposiu tien previsto axuntar ente 400 y 600 persones.
“Tratase d’un eventu perimportante pa la ciudá porque ye un congresu de gran envergaura, que dará puxu a los aloxamientos nuna fecha fuera de temporá turística, aidándonos nel nuesu apueste por desestacionalizar el turismu y la promoción económica”, comenta Ángela Pumariega, teniente primera d’Alcaldía y conceyala d’Economía, Emplegu, Turismu y Anovación. “Xixón sedrá un referente por ser puntu d’alcuentru de profesionales y asociaciones relacionaes col alzhéimer, abordando temes de muncha actualidá que nun se tienen en cuenta d’avezul y que, amás, dende un puntu de vista social, ye un tema que afeuta a munches families”, añade. “Tenemos l’enfotu, dende la conceyalía de Turismu, de qu’esti congresu seya un ésitu y que Xixón seya visto comu una bona ciudá p’acoyer congresos y conceyos profesionales”, conclúi la conceyala.
Baxo l’eslogan “Integrando l’anovación”, nel congresu participarán, como ponentes, persones y profesionales implicaos nel texíu asociativu y de cualesquier otra estaya venceyada direuta o indireutamente col abordaxe integral del Alzheimer y l’atención a les persones afectaes.
Según la conceyala de Servicios Sociales, Vivienda y Educación, Ángeles Fernández-Ahúja, “la cellebración en Xixón del X Congresu Estatal d’Alzheimer pue suponer un finxu importante na xera de prevención y llucha contra esta enfermedá. Van tratase los avances farmacolóxicos na prevención y llucha contra ella, tres más de 20 años ensin novedaes nin avance algún. Tamién va a tratase’l tema del diagnósticu precoz del alzheimer y del impautu que causa a nivel familiar y social. Va aporfiase’n que ca vuelta persones más moces tan siendo diagnosticaes con esta patoloxía u otres demencies, comu consecuencia de la inxesta abusiva d’alcol, de la drogadicción o del tabaquismu. Poro, hai que sensibilizar a la población más mozo de les secueles qu’estos vezos puen causar en pocos años. Son temes de vital interés y ye una gran noticia que Xixón puea acoyer esti congresu apináu de novedaes nel ámbitu farmacolóxicu y tamién na posibilidá d’avanzar nun diagnósticu precoz d’esta enfermedá”.
El conceyu va sirvir p’aportar y recibir conocimientos que sirvan p’adautalos y afitalos nes asociaciones confederaes y n’otros recursos, públicos y privaos, que dan servicios especializaos na atención integral de les persones con Alzheimer y otres demencies.
Susana Sela
This work is licensed under a Creative Commons Attribution 4.0 International License.
