Bonos díes, bona xente.
Alborecemos col cielu cubiertu ya con unes temperatures que tan alrodiu de los 20ºC, rexistrándose nel puirtu Payares 10,9ºC.
Güei vamos tener nubosidá abondosa que vendrá acompangada de precipitaciones febles nel llitoral a partir del mediudía, yá pela tarde puen dase tamién nel interior ya cordelera, sobre too na fastera oriental con unes temperatures másimes en descensu bultable, sobre too en zones de montaña ya l’aire sedrá sele con predominiu de la componente norte.
Mañana sábadu tendremos intervalos nubosos con precipitaciones intermitenes pela mañana nel llitoral, siendo poco probables nel interior anque pela tarde van traslladase al restu d’Asturies llegando a tener calter moderáu ya intensificándose en frecuencia ya intesidá a últimes hores pa dexanos una nueche pasada por agua en toa Asturies. L’aire del norte dirá ganando fuercia con raches moderaes en puntos de la costa y zones altes de la cordelera con unes temperatures que siguen en descensu.
Durante’l riscar del domingu y l’aborada los xarabatos van ser frecuentes ya intensos ya inclusu de nieve nes cumes más altes de Picos d’Europa que vendrán acompangaos de raches moderaes de vientu de componente norte-noroeste ya con dalguna truena nel llitoral, pa dir meyorando dalgo durante’l día, espaciandose los xarabatos, abriéndose dellos claros ya baxando n’intensidá con unes temperatures que siguen baxando llixeramente.
La selmana viniente sedrá más seliquina y subirán les temperatures con un tiempu más normalizáu.
Como curiosidá, previo a la truena que tuvimos nel riscar del miércoles na fastera central d’Asturies, mos afeuto un reventón cálidu, surdiendo repentinamente aire mui caliente provocáu pola tormenta, faciendo que se dispararen les temperatures, en minutos, perriba de los 30ºC, rexistrándose les másimes en delles estaciones meteorolóxiques durante’l riscar, llegando inclusu a los 33ºC en dalguna d’elles y baxando de nuevu col pasu la truena.
Paez qu’esta fin de selmana yá sedrá más propiu de la seronda y la siguiente selmana normalizaranse les temperatures que paséis un bon vienres collacies ya collacios.
This work is licensed under a Creative Commons Attribution 4.0 International License.
