Dar puxu al tresporte ferroviariu y pasar el tráficu per carretera per un túnel baxo la ría ye la propuesta que faen dende la CEA pa meyorar les comunicaciones nel Puertu d’Avilés
Acordies la Coordinadora Ecoloxista d’Asturies, l’alternativa más viable, ambientalmente más caltenible y más operativa pal tráficu rodáu, sedría un túnel perbaxo la ría que permita xunir les zones industriales a dambos márxenes de la mesma, ensin necesidá de dar una vuelta de dellos kilómetros, comu se propón, medrando el ya continúu tráficu de camiones pente orielles del puertu.
Per otru lláu, nel puertu d’Avilés les mercancíes qu’entren y salen por carretera son un 62,7%, mientres que les que lo faen por ferrocarril representen un 7,8%, polo que’l futuru del trasporte del área portuaria pasa, pa los ecoloxistes, por aumentar el treslláu por ferrocarril en detrimentu del que se fae por carretera, teniendo en cuenta que ya hai dos llínies d’anchos distintos (ibéricu y métricu) furrulando na oriella zorga y que ta previsto en breve’l furrulamientu de la llínia anchu ibéricu na drecha pa serviciu portuariu.
Dende la CEA tachen d’interesadamente sesgáu l’estudiu d’impautu ambiental estudio de impacto ambiental y creen que’l proyeutu que se presente tien de cumplir l’alcuerdu de la Xunta Xeneral de consensuar colos conceyos afeutaos un nuevu trazáu pa la futura ronda d’acesu al puertu d’Avilés, atendiendo a la proteición del padremuñu cultural, hestóricu, medioambiental, urbanísticu y vial d’esos conceyos. Amás, les alternatives que se planteguen tienen d’evitar la confrontación de los territorios involucraos (Castrillón, Avilés y Gozón).
Alberto Rodríguez
This work is licensed under a Creative Commons Attribution 4.0 International License.
