Una dellegación de la Revista LA SIDRA y de la Fundación Asturies XXI desplazóse a Xapón pa presentar el XIII SISGA (Salón Internacional de les Sidres de Gala) y participar na Tokyo Cider Collection 2023, una de les mayores feries internacionales de sidre

Anzu Fernández, dellegáu internacional de la Fundación Asturies XXI,  imparte dos conferencies dientru del ciclu formativu de la Tokyo Cider Collection 2023, eventu de referencia’n tol continente asiáticu qu’esti añu cellebra la so ochava edición. Amás, presentará el SISGA y la cultura sidrera asturiana nel so pasu por nueve ciudaes nipones.

La primera de les conferencies tuvo llugar el 24 xunetu n’Hiroshima, como parte’l seminariu de sidre pa profesionales de la hostelería entamáu pol llagar Kimura nel edificiu YMCA del cientru la ciudá nipona, y nella participaron Tatsuro Fuji comu llagareru de la Fukiware Cidrerie de la prefectura de Gunma y Anzu Fernández Pérez y Aymara González Montoto comu representantes de la Fundación Asturies XXI.

Dientru’l simposiu, desendolcáu dafechu’n xaponés, amás de presentase’l XIII Salón Internacional de les Sidres de Gala, -que tendrá la so treceava edición esti setiembre- falóse de la tradición sidrera asturiana, peculiaridaes de la nuesa sidre, situación d’anguañu,  tendencies nel mercáu y del procesu pa que la cultura asturiana de la sidre seya reconocía pola Unesco como Padremuñu Inmaterial de la Humanidá.

Especial interés causó nel públicu nipón la demostración d’echar sidre, asina comu la tastia guiada de sidres asturianes, na que s’ufrió a los asistentes, profesionales del seutor, llagareros y direutores de la industria hostelera nipona, sidre de Mayador, Busto y Martínez Sopeña.

La segunda conferencia, tendrá como escenariu’l rascacielos Tokyo Big Shigt, cuntando col sofitu del llagar Fukiware Cidrerie y la sidrería tokiota Sidrería Eclipse First.

Darréu esti ciclu de conferencies que los representantes asturianos dan a lo llargo’l so itinerariu per nueve ciudaes de Xapón espérase cuntar con una perbona representación xaponeses nel prósimu SISGA, abriendo esti mercáu a los llagares asturianos.

Susana Sela

Asturies na Tokyo Cider Collection 2023 – YouTube

This work is licensed under a Creative Commons Attribution 4.0 International License.