Hai marques y productos que son por si mesmos identificativos d’Asturies, marques que lleven nelles la seña de la identidá asturiana y  de les que tol mundiu reconoz l’orixe porque tan venceyaes a la cultura, l’arte, la llingua y la identidá asturiana.

Referímonos polo xeneral a productos lligaos al mundiu rural y a los medios tradicionales de vida n’Asturies, polo que el so desendolcu va lligáu al de la población rural, lo que les fae entá más emportantes.

Sicasí, denuncien dende Andecha, Asturies ca vegá tien más problemes cola propiedá o la xestión de marques rellacionaes cola identidá’l país, daque de lo que responsabilicen direutamente al  Gobiernu de Barbón, de quien afirmen que “no fondero, prefier que se vaiga sumiendo la identidá asturiana”, por muncho que los sos responsables de redes y márketing “pinten a Barbón comu’l campión de l’asturianía”. 

Pa evitar seguir nesi camín, los nacionaliegos proponen que les marques rellacionaes cola hestoria, la cultura, l’arte, la llingua, la identidá asturiana’n xeneral sólo deberíen poder ser rexistraes pol propiu Gobiernu d’Asturies, dotando esti ámbetu de seguranza xurídica y política beneficiosa pal interés común.

Pa ello, aporfien, son necesarios dos requisitos, tener un Gobiernu propiu que nun seya asturianu sólo pela vía’l márketing, sinón pela vía de les sos polítiques efeutives y que les competencies de rexistru marques pasen del Estáu al Gobiernu d’Asturies. “Ésti ye otru motivu más pol qu’Asturies necesita superar con urxencia’l marcu estatutariu col que se mos llenden toles posibilidaes d’atender les nueses necesidaes y d’escoyer pa ello’l nuesu propu camín”.

Como prebes de la situación que denunciesn escueyen dos casos mui reciente, Xata Roxa y la botella sidre.

La primera dexa la marca Xata Roxa en manes d’una asociación privá, l’Asociación de criaores de la raza Asturiana de los Valles (Aseava), formá por criaores y un comercial mayorista, pa controlar la garantía d’orixe y afalar la venta carne d’esa raza. “Cuandu esta asociación esplotó comercialmente de mou afayaízu la marca, recibiendo pa ello abondes aídes públiques, fízolo beneficiándose d’un padremuñu asturianu, comu ye la raza de la Xata Roxa, l’Asturiana de los Valles. Pero cuandu entamaron a descuriar la marca, abandonando les carniceríes propies, dexando ensin fonciones y ensin sueldu a 26 trabayaores, desatendiendo los intereses de cuasi 500 criaores asociaos… non sólo tán xestionando la ruina d’un importante seutor productivu, sinón que tamién tán arruinando la valiosa imax d’una gran marca asturiana, que, por lóxica, debiere ser propiedá de toos”.

La otra cuestión que ponen enriba la mesa ye la botella tradicional de sidre, conocía comu modelu “Molde fierru”, que de magar la cabera sentencia pasa a ser propiedá esclusiva d’otra asociación privá: l’Asociación de Sidre Asturiano (ASSA), presidía María Cardín Blanco, dueña del grupu empresarial El Gaitero. “Per un llau, ye d’agradecer que, énte la pasividá indiferente del Gobiernu de Barbón, ASSA defendiere l’asturianidá de la botella de los intereses comerciales d’empreses santanderines; pero tampocu nun ye normal qu’un padremuñu cultural comu’l que representa la botella tradicional de sidre tea en manes d’una empresa privá”.