El postrer domingu d’agostu va tener llugar la tradicional puya pola pieza quesera ganadora del concursu
El Certame del Quesu Cabrales superó yá’l so mediu sieglu de vida y va sumar esti añu la so edición númberu 51. Fadrálo siendo amás unu de los concursos queseros más reconocíos a nivel mundial, una y bones la tradicional puya pola pieza ganadora suma dos Guinness World Records al quesu más caro nuna puya. Féxolo amás de forma consecutivo, nos años 2018 y 2019, cuando s’estableció l’actual cifra record, de 20.500 euros.
L’añu pasáu, anque nun llegó a superase la cifra récord, algamóse una cantidá nada refalgable de 17.000 euros, la segunda mayor de la hestoria (completa’l podiu los 14.300 euros de 2018). Foi El Llagar de Colloto, per tercer ocasión consecutiva en llográndolo en 2018 y 2019 (nos años 2020 y 2021 nun hubo certame por mor del andanciu) quien llevó la meyor pieza del concursu, de la quesería Francisco Bada C. B.
“Ye un honor que’l Certame, y el Quesu de Cabrales, ca vegada llegue más lloñe y tea de boca en boca”, aseguró la presidenta de la DOP Quesu de Cabrales, Jéssica López. “Queremos animar a los mozos a que cueyan el relevu xeneracional, por que nun se pierda esta tradición porque sería una gran perda pa Cabrales, Asturies, España y el mundu”, enfatizó.
Igualmente, Begoña López, directora xeneral de Desenvolvimientu Rural, remarcó que’l Principáu d’Asturies “dobló’l so apueste en favor de les marques calidable como la DOP de Cabrales y otros colamos calidable, pola so importancia pal mediu rural”.
Esti añu, el certame va celebrase, como ye costume, l’últimu domingu d’agostu, día 27, n’Arenas de Cabrales, que volverá convertise na capital mundial d’esti quesu tan especial. Fadralo cola tradicional puya, onde establecimientos hosteleros puxarán por alzase col premiu a la meyor pieza quesera.
Enantes, el xuráu del concursu va escoyer el meyor quesu cabrales del mundiu, puntuando parámetros como l’aspeutu del corte (collor de la pastia y desendolcu del mufu penicillium), carauterístiques g olfatu-gustatives (golor y saborgu, retrogustu, persistencia), la testura y d’últimes la impresión global fasta un másimu de 126 puntos. Sedrá entós cuando se conoza quién toma’l testigu de la Francisco Bada C. B., ganadora de la postrer edición.
Tamién el públicu aficionáu a la gastronomía va tener el so espaciu, con un gran mercáu con puestos nos que van poder alquirir esta preciada xoya culinaria única d’Asturies pola so intensidá carauterística, a la que se sumen les sos vetes verdeazuladas, y les sos notes picantes que namás puen desendolcase nes cueves de los montes asturianos, en plenos Picos d’Europa. Nelles dase de forma natural una temperatura estable d’alrodiu 10 graos y un mugor del 90%, favoreciendo’l desendolcu de mohos del tipu “penicillium”.
El Cabrales foi ún de los primeros quesos en ser amparaos por una Denominación d’Orixe, que contribuyó notablemente al so espardimientu y escomenzó a lluchar escontra’l fraude. Foi nel añu 1981, y namás el quesu Roncal consiguiera esta figura de protección, apenes unos meses antes.
Alberto Rodríguez
This work is licensed under a Creative Commons Attribution 4.0 International License.
