Enar Areces y Xicu Ariza dan vida a un proyeutu propiu que-yos permite caltener una conexión especial cola so tierra llariega

Puru Remangu ñació ensin un plan definíu, pero en poco tiempu convirtióse nun referente na producción de ropa con mensaxes n’asturianu, tresmitiendo una poderosa imaxe de marca. 

Magar que l’entamu nun fue cenciellu, creyer nes sos idegues llevó a Puru Remangu a medrar orgánicamente, calteniendo la so autenticidá y frescura. Too surdió pola necesidá d’Enar de construyir un proyeutu que la venceyara a Asturies cuandu vivía en Madrid. Con el nome na mollera, entamó a facer camisetes que vendía a collacios y familiares per Instagram.

Na dómina d’encierru pola mor de la pandemia, Enar somorguióse dafechu y con puru remangu nes sos idegues, trabayando les redes sociales y l’espardimientu la marca. Antuañu ye un negociu bien afitáu y prestosu, que fai qu’Enar y Xicu tengan planes futuros, pero siempres colos pies en suelu, p’algamar un equilibriu que-yos permita medrar de manera controlada.

Enar sabe que les emociones xueguen un papel importante y quier xestionales pa caltener perspeutives realistes. Sicasí, la felicidá que siente cuandu ve como les sos idegues cobren vida ta penriba los mieos y les dulbies.

Dende l’entamu, Enar alcontró en Xicu, la so pareya, el sofitu que necesitaba pa desendolcar el proyeutu de Puru Remangu y enfotase na parte creativa del negociu y conocer a otros emprendedores que-y apurren orientación y sofitu nesti emocionante viaxe.

Susana Sela

This work is licensed under a Creative Commons Attribution 4.0 International License.