Decenes de nueves istalaciones enerxéticas tan costruyendose nel occidente asturianu ensin qu’esista un plan d’ordenación, a costa de la biodiversidá, el paisaxe y les formes de vida tradicionales y a pesar de qu’Asturies produz ya más enerxía de la que consume

Cuando la produción d’enerxía de los parques eólicos supera a la demanda nel intre, los escedentes tienen de ser almacenaos, pa poder ser utilizaos cuando la demanda supera a la produción. El proyeutu p’almacenar los sobrantes de los parques eólicos de los conceyos de Grandas de Salime y Pesoz, el nomáu Sistema d’almacenamientu Stand Alone ST Grandas de Salime de 200 Mw, consiste en 100 contenedores con bateríes de 2 Mw.

Les viviendes de Santa Marina de Salime van quedar a 200 metros del proyeutu, una distancia de seguridá que tanto vecinos comu ecoloxistes ven insuficiente. Nun esiste estudiu de la contaminación d’electropolución y acústica del parque d’almacenamientu y los vecinos ya carecen la prosimidá de la subestación llétrica de Sanzo de Pesoz, a 700 metros. 

Esti parque d’almacenamientu ye un más de les decenes de nueves istalaciones enerxéticas que se tan costruyendo nel occidente asturianu, a costa de la biodiversidá, el paisaxe y les formes de vida tradicionales y a pesar de qu’Asturies produz ya más enerxía de la que consume. Trátase d’istaciones d’almacenamientu, parques eólicos, estaciones de bombeu, llínias d’evacuación y subestaciones llétriques, que tan permitiendose ensin qu’esista un plan d’ordenación d’estes nueves istalaciones llétriques sometíu a Evaluación Ambiental Estratéxica. Recordemos qu’Andecha Astur lleva meses solicitando una moratoria eólica y fotovoltaica qu’evite esta falta de control, ensin que recibiere entá dala rempuesta del gobiernu asturianu. 

Susana Sela

This work is licensed under a Creative Commons Attribution 4.0 International License.