La Güerta Monga ye munchu más qu’un proyeutu agrícola, ye un suañu aú cada semiente guarda una hestoria enllena de pasión y amor pola naturaleza. El so oxetivu cimeru ye revitalizar el campu y algamar un estilu de vida ecolóxicu.

En Monga, un pueblu ubicáu nel fermosu conceyu de Nava, Paula Cristóbal Caso y’l so maríu, Xosé Antón, decidieron escribir la so hestoria, estrumiendo’l so amor pola naturaleza. Poro, ñació La Güerta Monga, un proyeutu agroecolóxicu que-yos permite vivir cola so fía n’armonía cola tierra, de manera caltenible.

Con esti oxetivu, mercaron una gran finca de 7200 m². Utilizaron 1200 pa construyir unos hibernaderos, aú semaron los sos primeros tomates, pimientos y berenxenes, mentantu que’l restu’l tarrén destináronlo a les coles, puerros y callabacines, que medren baxo’l sol asturianu. Arriendes d’ello, cunten cola compañía les sos oveyes xaldes, la so yegua y dos burrines, que-yos echen un gabitu pa desbrozar y abonar.

Sicasí, La Güerta Monga espárdese más enllá. En Sienra, tamién nel conceyu Nava, y en Cabana, en Tinéu, Paula y Xosé Antón tienen otres dos finques aú medren dellos frutales pataques y cebolles. La diversidá ye una de les sos fortaleces y cada alimentu que ñaz na so tierra ye parte fundamental del proyeutu.

Convencíos dafechu de que la venta direuta, ensin intermediarios, ye perimportante, Paula y Xosé Antón baxen tolos martes al mercáu de la Pola Siero, ufriendo los sos productos frescos y saludables. Arriendes d’ello, entamen xornaes de puertes abiertes pa que cualaquier persona que-y preste pueda visitar la so güerta y compartir momentos perespeciales. 

La Güerta Monga nun se llimita a vender verdures, tamién constrúi perguapes rellaciones pente productores y consumidores. Tamién nagüen por construyir una nave autosuficiente a nivel enerxéticu, pa poder producir sidra y vinagre de mazana madre.

El proyeuto d’esta pareya ye más qu’una actividá agrícola, ye una forma de vida, un regresu al raigañu y una semiente d’esperanza pa les xeneraciones que vienen, representaes na figura la so fía. Nun mundiu toa vuelta más individualista, La Güerta Monga relluma como un faru d’esperanza, abriendo les puertes a una vida saludable y respetuosa col mediu ambiente.

Susana Sela

This work is licensed under a Creative Commons Attribution 4.0 International License.