La empresa sidrera xixonesa recibe un reconocimientu a la so xestión alliniá colos Oxetivos de Desendolcu Caltenible,
La certificación Biosphere Sustainable distingue a empreses y entidaes qu’amuesen nos sos procesos de xestión el so enfotu nel cumplimientu de los 17 ODC (Oxetivos de Desendolcu Caltenible), determinaos pola Axenda 2030 de Naciones Xunies, que tienen comu finxu esparder una mayor responsabilidá na toma de decisiones de tolos axentes del turismu nos ámbetos ambientales, económicos, culturales y sociales, consiguiendo amás d’esa mena un xorrecimientu de la calidá, competitividá y diferenciación del serviciu.
Casa Trabanco ye la cabera empresa en sumase a la llista d’entidaes con reconocimientu de negociu caltenible y turismu de calidá. Recordemos que Casa Trabanco non solo busca’l consumu de cercanía sinón que tien plantaciones propies nos alrodios del establecimientu colos qu’abastecese de dellos de los productos que sirven na so sidrería, garantizando la frescura y l’ausencia de tresporte, minimizando al másimu la so güelga de carbonu, ensin escaecer que la sidre ye de la casa.
Tou ello, xunío a la so tresparencia nos procesos productivos y la involucración del visitante nos mesmos, facilitándose-y na so visita la posibilidá de conocer el so llagar y pasear pente les pumaraes, faen a Casa Trabanco merecedora d’una distinción qu’ensin dubia los aidará a siguir xorreciendo.
Susana Sela
This work is licensed under a Creative Commons Attribution 4.0 International License.
