La denuncia d’Andecha Astur obliga a VOX a matizar les sos declaraciones respeutu al asturianu pa tratar de safase de responder pol delitu d’odiu
Sara Rouco Varela, conceyala de Vox, matiza el so vetu a los artistes qu’usen l’asturianu: podrán actuar, aceuta, siempre cuandu “nun seyan un sofitu a la oficialidá”. Estes declaraciones, ambigües y forciaes, son consecuencia de la rempuesta popular al so anterior discursu de “si se pué, nun los contratamos”, que los llevó ante Fiscalía gracies a una denuncia interpuesta primeramente por Andecha Astur, que la conceyala tildó de “ruíu de les esquierdes” y que foi repetía por más de mil persones que la descargaron y reunviaron colos sos datos dende la páxina d’esti partíu. Amás, el Manifiestu Música n’Asturianu Sí recoyó ya 4.200 robles, que sedrán presentaes al Conceyu con una moción pa garantizar y promover la música n’asturianu y la llibertá d’espresión.
Nes sos nueves declaraciones, Sara Rouco esclaria que’l so partíu “identifícase dafechu cola defensa de la cultura y tradiciones asturianes y respeten absolutamente tolo relacionao cola identidá d’Asturies”, pallabres qu’ensin dubia se vio forciada a prenunciar anantes de dexar nidio nuevamente les sos postures, seique espresaes con más discreción.
La conceyal, nun sabemos si por despiste, inorancia o cenciella mala fe, asegura que nun tán “contra los bables pero sí contra l’usu de la llingua”, recurriendo a una fórmula arcaica pa referise al asturianu que mos retrotrae a la caverna de los “sensatos y pensantes”. Sicasí, esos teóricos artistes contratables, capaces d’utilizar los bables, pero non la llingua, tendríen tamién otra cortapisa a la d’actuar en Xixón: nun podríen sofitar la oficialidá; suponemos que quier decir esplicitamente, porque’l mesmu fechu d’usar l’asturianu lleva implícito la demanda d’oficialidá. “Si los espectáculos van ser un apoyu a la cooficialidá, nun vamos apoyalos”, reiteró delles vegaes na so intervención, añadiendo que “si hai mensaxes d’ideoloxíes de les esquierdes nun se programará” . Rouco finó les sos declaraciones aprofitando pa recalcar que nun ta contra les persones LGTBI, pero que “nun tienen por qué tar colleutivizaos”, cargándose namás nun discursu el drechu a la llibertá d’espresión, los drechos llingüísticos ya’l drechu d’aconceyamientu.
Ante la polémica, l’alcaldesa Carmen Moriyón tamién se vió forciada a intervenir, esclariando “qu’en la ciudá nun dexarán de contratase artistes qu’usen l’asturianu”, contradiciendo a Sara Rouco. Incluso Santiago Abascal nun se resistió a intervenir la espirica, dexando nidio qu’en Xixón “va defendese la lengua española”, seique permitirán, magnánimos ellos, que los xixoneses falemos na intimidá “del modo que falen los asturianos”.
Llucía F. Marqués
This work is licensed under a Creative Commons Attribution 4.0 International License.
