La Confederación Hidrográfica del Cantábricu informa del aniciu l’espediente sancionador contra’l Conceyu de Colunga pol mal furrulamientu de les depuradores en Lluces (Palmián, la Rasa y Vallín) que recueyen les agües residuales de les viviendes de la zona, tal comu denunciaren dende la Coordinadora Ecoloxista d’Asturies
Dende l’añu 2003 esiste un proyectu municipal pa conectar estes depuradores de Lluces cola depuradora de Colunga, daqué que 20 años dempués inda sigue ensin facese. Los colectores xeneren fuertes fedores, especialmente n’époques de calor. Les agües que salen d’elles presenten mal color y abondos sólidos, tal que pue comprebase al so alredor, col consiguiente impactu nel dominiu públicu de la cuenca del ríu Llastra y Frayón, agües residuales qu’acaben nos pedreros cola consiguiente contaminación.
Fasta agora’l Conceyu nun adoptó les midíes afayaices pa iguar esti problema ambiental nin llevó a cabu denguna actuación tendente a evitar estes molesties a los collindantes.
Dende la CEA declaren que “entrín y non, los daños ambientales yá tán fechos. Una degradación de la nuesa redolada natural, ca vuelta más peligrosa, qu’asocede por culpa de la neglixencia y la tolerancia de les autoridaes responsables de curialo y de xixilar la so estabilidá. Una actitú ca vegá más indolente y suicida que paez optar por nun tomar les midíes afayaices pa desaniciar la contaminación tres años d’alvertencia”.
Alberto Rodríguez
This work is licensed under a Creative Commons Attribution 4.0 International License.
