Misa, xura de bandera española, desfile militar y conciertu de la banda l’exércitu… el Generalísimo taría arguyosu
Nel marcu de les actividaes realizaes por cuenta de la cellebración del Día de les Fuerces Armaes, tuvo llugar en Villaviciosa una xura de bandera pa personal civil na plaza’l Conceyu de Villaviciosa. Daqué asina nun asocedía dende va un cuartu sieglu, lo que espeya nidiamente la vuelta atrás que ta careciéndose nos caberos tiempos. De xacíu, y dientro de la mesma linea de retrocesu, el programa abrió a les diez de la mañán con una solemne misa, previa a xurar la bandera, y posterior desfile militar. Tou ello mui al estilu de cualisquier dictaura que se precie.
Amás, mientres la fin de selmana la Cai Cervantes y la zona del Parque Ballina tornose n’una esposición de vehículos, armamentu y material de combate militar. A les 20 hores, l’esperpentu remató col conciertu de la Unidá de Música Militar de La Coruña na Plaza’l Conceyu.
Actividaes asemeyaes desendolcáronse apocayá n’otros conceyos asturianos como Cangues d’Onís, Siero o Cangas. El procesu d’ablancazamientu de les Fuerces Armaes y d’esaltación del arguyu español que lleva en marcha dende va unos años, sol mandáu del “gobiernu más progresista de la hestoria”, desplica la meyora de la estrema derecha nes caberes elleiciones y señala escontra un futuru esmolecedor.
Llucía F. Marqués
This work is licensed under a Creative Commons Attribution 4.0 International License.
