Qu’ambure lo malo, que quede lo bono. Que s’absuelva a les sindicalistes condergaes, que quede la solidaridá
Si San Xuan ye la nueche más máxica del añu, la d’ayeri’n Xixón foilo duplemente; a la tradición xunióse la llucha polos drechos obreros y sindicales nun actu, entamáu pol Comité de Sofitu a les 6 de La Suiza, que prendió llames dende la Punta Liquerique fasta lo alto Cimavilla pa vindicar que facer sindicalismu nun ye delitu. L’actu foi visible dende toles sableres onde la xente esperaba pa cellebrar la Foguera de San Xuan.
Un cientu presones participaron n’antorchá qu’enllenó de fueu la nuechi sanxuanina, menutos anantes del prendíu de la foguera, en solidaridá coles 6 condergaes a 21 años de prisión y 150.000 € d’indenizaciones, sólo pol “delitu” de protexer a una compañera supuestamente acosá llaboral y sesualmente pol patrón.
“Ayeri non sólo ardió l’horizonte marín de Xixón, sinón qu’esperamos haber quemao cola antorchá tolos malos espíritus d’una xusticia española que protexe al empresariu enantes qu’a la clas trabayaora” declaró Mariano Suarez, d’Andecha Astur, una de les organizaciones que componen el Comité de Sofitu.
Pa tar al díe de les movilizaciones y del casu de Les 6 de la Suiza, visitar les sos redes sociales y so páxina web.
Alberto Rodríguez
This work is licensed under a Creative Commons Attribution 4.0 International License.
