El Proyeutu, que nun atendió a los allegamientos de los ecoloxistes pesi a llevar dos años tramitándose, allugará pente 50.000 y 100.000 tonelaes de residuos al añu

L’actual cantera abandoná na llocalidá de Venta la Salve (Siero) acoyerá una planta de tratamientu de residuos de construcción y demolición (RCD) que presenta un plan calificáu pola Coordinadora Ecoloxista d’Asturies de “inviable, neglixente y mui precariu”, ya que nel so Plan Especial nun tien en cuenta delles cuestiones d’importancia pa controlar el so impautu ambiental. 

Asina, les zones de machaqueu y cribáu tarán albentestate, favoreciendo un fuerte impautu acústicu y la dispersión de povisa, una bones nun tan previstos paramentos llaterales pa torgar l’aición del vientu. Nun hai planificación pal soministru d’agua nin, lo que ye más grave, el saneamientu de les agües residuales resultantes de l’actividá, que podríen afeutar seriamente a les agües soterrañes. Tampocu se tien en cuenta l’impautu del tránsitu de camiones apinaos de residuos pela carretera SI-8 Pola Siero-Valdesoto, nin l’efeutu acumulativu de les abondes actividaes desendolcaes na fastera, comu la planta d’hormigones d’al par, l’autovía o’l circuitu de motocross. 

Alberto Rodríguez

This work is licensed under a Creative Commons Attribution 4.0 International License.