Los antidisturbios realizaron esibiciones nel colexu La Carriona, incluyendo cargues policiales y actuaciones de los mesmos policies qu’apalizaron a los familiares y vecinos de los escolinos

Si nes escueles d’Avilés hai que cuntar al escolináu daqué de los antidisturbios, ye que son les fuercies del Estáu que dexaron firíos nes cais a trabayaores d’Asturiana de Zinc en 2008, les qu’apalizaron y detuvieron trabayaores d’Alcoa en 2019, les qu’ocuparon carreteres avilesines pa frañer la fuelga’l tresporte’n 2022…

La Policía Nacional española presentó varies de les sos xunidaes, ente elles una Unidá d’Intervención Policial (UIP), normalizando pente los escolinos preseos comu los uniformes d’intervención especial, escudos, toletes, escopetes llanzapelotes y otros materiales antidisturbios.

Esibiciones de fuercies armaes españoles, fuera dafechu de cualisquier contestu educativu, faense cuantayá nos centros educativos asturianos, a vegaes con policíes, a vegaes con otros cuerpos o fuercies de seguranza del Estáu. Asina la Guardia Civil, un cuerpu militarizáu, intervino énte l’escolináu del Colexu d’Arenas (Cabrales, abril 2022), del Colexu Príncipe Felipe (Tapia, mayu 2022), del Colexu La Vallina (Lluanco, abril 2023) o del Colexu Peña Tú (Llanes, abril 2023).

Sicasí, lo asocedío en La Carriona va un pasu más alla, camuflando d’actu educativu non solo el blanquiamientu de la policía, sinón una violenta carga policial de la UIP, comu les que se faen contra manifestantes y trabayaores, como si d’un fechu admisible ya inclusu loable se tratare.  “Dexar que la UIP corra pel patiu la escuela con escopetes llanzapelotes nes manes… ye una imax que va más allá de cualisquier alderique ideolóxicu razonatible y que nun atopa encaxe en nengún modelu educativu públicu” declaró Mariano Suari, profesor xubiláu, en nome d’Andecha Astur.

Estes actuaciones policiales y militares nes escueles tán sofitaes tanto pol Gobiernu “megaprogresista” de Madrid comu pol “socialista” de Barbón, y respuenden al so determín de blanquiar el militarismu y el monopoliu estatal de la fuercia énte les neñes y neños d’Asturies. Poro, la Conseyería d’Educación soscribe voluntariamente ca añu la so collaboración nel “Plan Direutor pa la convivencia y meyora de la seguranza nos centros educativos”, que tolos cursos ellabora’l Ministeriu l’Interior y que tien comu oxetivu reconocíu “que xorreza l’enfotu la reciella y la mocedá nes Fuercies y Cuerpos de Seguranza del Estáu”.

Andecha Astur reclama que la Conseyería d’Educación cese urxentemente al direutor d’esti centru y pide al Gobiernu de Barbón que la Conseyería d’Educación se desvincule del Plan Direutor del Ministeriu l’Interior, garantizando que los nuesos centros educativos dexen de ser platós progangísticos del militarismu español.

Redaición InfoAsturies

This work is licensed under a Creative Commons Attribution 4.0 International License.