Representantes de la organización muévense estos díes per Xixón pa conocer les sedes y provisores llocales
Xixón va acoyer la edición estatal de 2024 del Association Meetings Workshop (AMW). Trátase d’un alcuentru de trabayu nel que los responsables de les principales asociaciones y sociedaes estatales pueden conocer la ufierta de destinos y provisores pa la cellebración de los sos futuros congresos y eventos.
Entamáu por Mice & Forum Inside, esti alcuentru, que va cellebrase’l 7 y 8 de febreru de 2024, va aconceyar a más de 35 compraores cualificaos, decisores de les principales sociedaes y asociaciones del estáu, y a 60 provisores pa la organización de congresos y eventos del segmentu asociativu.
Sedría la primer vegada qu’estos alcuentros, de referencia nel segmentu asociativu, escueyen un destín asturianu. Los organizadores moviéronse estos díes per Xixón, onde van conocer de primer man y acompangaos por téuniques del Xixón Convention Bureau delles de les sedes del alcuentru, como l’Hotel Abba Playa Xixón, l’Hotel NH Xixón, l’Hotel Zentral Xixón Rei Pelayo, el Llagar de Castiellu y Llaboral Ciudá de la Cultura. Nesti postreru, van tener la oportunidá d’aconceyar con provisores llocales.
Les xuntes programaes ente compraores y provisores, sumaes a les esperiencies compartíes mientres tol eventu, xeneren sinerxes granibles y oportunidaes reales de negociu, especialmente pal destín anfitrión y los empresarios llocales. Nesti sen, acoyer esti alcuentru supón una oportunidá p’asitiar Xixón como see de congresos y eventos.
Alberto Rodríguez
This work is licensed under a Creative Commons Attribution 4.0 International License.
