El candidatu d’Andecha Astur a la presidencia d’Asturies llama a la creación d’un frente común asturianu d’izquierdes tres l’espoxigue de la drecha nos caberos comicios
L’analís fechu por Andecha Astur de los resultaos elleutorales apunta a la necesidá de xunir fuercies y enfotos dientro de la izquierda asturiana, na llinia de creación d’un frente común que vienen defendiendo nos caberos años.
Reafírmense nesa conclusión de magar los malos resultaos de la izquierda española n’Asturies “Les propuestes sucursalistes nun furrulen, son alternatives qu’apaecen y desapaecen según decide Madrí, que tan encadenaes a decisiones nes que la prioridá nunca ye Asturies nin los Asturianos” declaró Roxu.
Tampocu confíen n’apaición de propuestes que nun apurren na nuevo y que, alvierten, francen l’escenariu políticu asturianu “Son flor d’un díe y faciliten el trabayu de quienes quieren ver a los asturianos dividios. Lo qu’Asturies necesita ye un Frente Común, asturianu y d’izquierdes” aporfia Roxu, qu’aprofitó la ocasión pa llamar a la población a organizase y pelear por un meyor futuru p’Asturies y la so xente. “Quedar en casa ye un lluxu que nun podemos permitimod. Hai que siguir, hai qu’espoxigar, ye necesario que la xente s’organice. Nun voi decir que tea de ser necesariamente con Andecha, pero la xente que tien un compromisu col país tien qu’organizase y buscar alternatives, vies pa meyorar el futuru d’Asturies”.
Pa finar, Diego Morís apuntó a la responsabilidá d’Adrián Barbón nel espoxigue y visibilidá del grupu d’estrema drecha española, VOX, al que’l PSOE dio un grupu parllamentariu tres los anteriores comicios.
Nel Dos Santos
This work is licensed under a Creative Commons Attribution 4.0 International License.
