La pancarta que reclama un profe pa los escolinos del IES El Socorru, de Lluanco, lleva un mes escolingada ensin que s’igüe’l problema
La falta de dotación de personal pa impartir les clases d’asturianu ye una costante na educación de la reciella n’Asturies, tanto na pública comu na privada. Les baxes nun se cubren, los profesores contrataos son escasos y los que paguen les consecuencies son los escolinos.
L’Istitutu de Secundaria El Socorru lleva tres meses esperando que se cubra la baxa del profesor d’asturianu, un plazu mui superior al admisible y que naide tien nidio que vaiga finar ceo. Ye un casu más del desdexamientu de la ensiñanza de la nuesa llingua por parte d’una alministración que torna concurrir a les elleiciones presentándose comu defensores del asturianu, pero que nun son quien siquiera a cumplir cola actual Llei d’Usu, que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu.”
Alberto Rodríguez
This work is licensed under a Creative Commons Attribution 4.0 International License.
