Les obres de caltenimientu -retrasaes dende’l 2021- son ya urxentes y tienen de facese, anque la Variante Payares, con más retrasos, entá nun tea operativa

A nivel políticu, Asturies ye pa munchos partios una sucursal madrileña, a un pasu virtual de la Gran Vía; pero a nivel físicu, viaxar a la Meseta ye siempres abegoso. Una autopista de llaceria a preciu de lluxu y unos trenes que siempres dan guerra y que demientres polo menos cincu díes van tar inautivos. Polo menos fasta’l 17 de mayu nun habrá serviciu ferroviariu por un corte téunicu na rampa Payares. 

Suponíase qu’esti corte, necesariu pal caltenimientu de la vieya cadarma, nun diba ser problema porque a estos altores tendría de tar abierta la Variante Payares, pero ¡oh, sospresa! esta opción torna a posponese, según indica’l Ministeriu de Tresportes, polo menos fasta’l mes del mesmu nome. 

Quienes quieran facer esti desplazamientu tendrá que dir de Xixón a Uviéu en cercanies (ensin posibilidá de llavar bicicletes nin animales de compañía) y el percorríu d’Uviéu a Llión n’autobús.