SUATEA denuncia que pente’l 70% ya l’80% de los profesores de llingua trabayen en condiciones d’alta precariedá, con medies xornaes coles que malpenes cubren gastos
SUATEA lleva denunciando va años y años l’usu abusivu que fai la Conseyería d’Educación de les medies xornaes, una midía que ñació pa casos puntuales y que de fechu estiéndese a cerca’l 75% del profesoráu qu’enseña llingua, condergándolos a la precariedá llaboral y faciendo que cientos de profesores trabayen pocu más que pa cubrir gastos de desplazamientu y/o vivienda.
El problema, lloñe d’iguase, va a más añu tres añu, alvierten dende’l sindicatu. Les consecuencies llaborales y socioeconómiques son evidentes pero tamién tienen un efectu directu na calidá que reciben les y los escolinos. Alvierten de que les medies xornaes son el pilancu más grande, xunto a la falta de la especialidá, pa que’l profesoráu algame una estabilización nos centros qu’aide a que l’asignatura s’asiente y se puedan desenvolver planes a mediu y llargu plazu. Los docentes tán condergaos a vivir tolos branos cola congoxa de nun saber si van tener trabayu y ónde, y los escolinos a saber si van tener escuela d’asturianu y cuándo.
“Duel ver casos onde hai hasta cinco escueles en menos de quinientos metros y cinco maestres o maestros d’asturianu trabayando en precario a media xornada como pasa n’Uviéu (La Gesta, Baudilio Arce, Buenavista I, Buenavista II y La Eiría). Casos d’estos hai un cientu a diferente escala nes ciudades y villes asturianes”
Los casos más recientes tamos viéndolos nos institutos de Cangas y Lluanco, que lleven esperando que se cubran les baxes meses ensin que la Conseyeríadea nenguna solución, más d’un trimestre ensin clas d’asturianu, mentes la Conseyería dedicáse a facer campañes pa que les families matriculen a les fíes y los fíos n’asturianu.
En SUATEA consideren que ye un problema de falta voluntá política pa iguar esta situación, daqué qu se conseguiría cola creación de la especialidá, a nivel d’educación, y la oficialidá, a nivel xeneral. Entantu y non, pidin que se tornen n’enteres la mayoría de les medies xornaes que se tán ufiertando.
Alberto Rodríguez
This work is licensed under a Creative Commons Attribution 4.0 International License.
