La movilización en defensa de la oficialidá de la llingua nacional asturiana saldrá de la Estación del Norte -Uviéu- mañana a les doce del mediudíe, d’aú aportará a la Plaza la Catedral, onde dellos grupos protagonizarán un conciertu
Esti añu’l manifestamientu nel que se desixe’l respetu de los drechos llingüísticos de los asturianos y por ende, la Oficialidá de la llingua nun coincidirá col actu istitucional de la Academia la Llingua Asturiana, que sedrá güei. Por contra, sedrá mañana cuando miles d’asturianos tornen a reclamar, por enésima vegada, un drechu tan innegable comu’l d’usar la llingua llariega.
L’ actualidá llingüística ta marcada poles prósimes elleiciones, depués de que nes anteriores los asturianos foren xabazmente engañaos con promeses por parte del mesmu PSOE que lleva años discriminando la llingua, promeses valeres que quedaron n’agua de lluvia y esculpies tan fálses comu risibles. Tamién ta de másima actualidá la discriminación llingüística, con un partíu (Andecha Astur, l´únicu que lleva delles convocatories dando la opción de votar n’asturianu) al que la Xunta Elleutoral refuga los escritos, pesi a evidenciar entendelos, allegando que tan en llingua non oficial.
Por tou ello ye polo qu’hai que tornar mañana de nuevu a les cais, depués de más de 40 años de vindicación llingüística, pa desixir una oficialidá completa y efeutiva, una oficialidá que, cuando se consiga, sedrá un trunfu pa tol pueblu asturianu que nun se rinde na desixencia de los sos drechos.
Nel Dos Santos
This work is licensed under a Creative Commons Attribution 4.0 International License.
