Visita Xixón trae a Jaime Chicheri, referente en revenue management pal sector turísticu, pa unes xornaes de formación que tendrán llugar los díes 25 y 26 d’abril nel Hotel Abba Playa Xixón
Los díes 25 y 26 d’abril tendrán llugar les xornaes de formación empobinaes a profesionales d’agospios turísticos de la ciudá que quieran meyorar la xestión y orientación de los sos negocios pa rentabilizar al másimu. La formación, que va realizase nel Hotel Abba Playa Xixón va tar al cargu de Jaime Chicheri, referente nel sector turísticu, especialmente na estaya del eCommerce, Revenue Management y Marketing Online pa hoteles, que desendolca programes formativos anovadores sobre estes téuniques.
Esta aición ta empobinada a profesionales d’agospios turísticos que seyan miembros de Visita Xixón Profesional, estaya de Visita Xixón que persigue l’ameyoramientu de la ufierta turística del destín.
Chicheri, espertu perconocíu a nivel internacional, va ufrir nestes xornaes una formación a midida, útil y práutica sobre les bases, el día a día y la estratexa precisa en revenue management nun negociu hoteleru, téunica na que lleva especializándose de magar l’añu 2009 y que consiste en sacar el beneficiu máximu de ca unidá de negociu.
Esti emprendeor, que yá punxo en marcha más de 20 proyeutos, ye’l creador de la comunidá RevenueKnowmads, enfocada a aportar conocencia y ayudar al profesional hoteleru, mentor de emprendedores y profesionales (especializáu nel sector hospitality), autor de los dos llibros primeros sobre Revenue Management, Marketing y Distribución Hotelera nel mundu escritos n’español, ente munches otres iniciatives.
No personal, prautica a diario la meditación Vipassana; adora la natación y crució l’estrechu de Xibraltar a nadu en 2019, circunstancia qu’aprovechó pa sofitar una causa solidaria na que recaudó más de 13.000€. Vive viaxando pel mundo na so furgoneta Juanita The Van colos sos perros Chino y Max.
Alberto Rodríguez
This work is licensed under a Creative Commons Attribution 4.0 International License.
