Esti pasáu Sábadu entamó Abril Insumisu, con un alderique que cuntaba cola presencia de Manuel Sánchez Teran, l’hestóricu sindicalista y trabayador de Duro Felguera que se zarró na catedral d’Uviéu; José Álvarez “Pola”, veteranu mineru qu’acarreta a los sos llombos una trayectoria de movilización y de resistencia envidiable; Adrián Tuero, trabayador d’hostelería bien activu en distintes plataformes y movimientos sociopolíticos; Héctor González, unu de los seis sindicalistes condergaes pol casu de La Suiza ya historiador del movimientu obreru; y Nuria García militante del espaciu La Llegra y moderadora del actu

Esta xornada, que foi bautizada como “Xorreciendo, una gueyada al pasáu pa construyir el futuru“, entamó faciendo una autocritica sobro la xera pendiente que tien la esquierda pa favorecer la participación de les muyeres nos espacios más militantes, daqué que como anunciaben de primeres la mesma organización va dise corrixendo a lo llargo de tuo esti mes, una tema delicá na que Teran fixo fincapié aludiendo a les sos propies esperiencies y de como nel so conflictu incorporáronse delles muyeres pesi a que nenguna d’elles trabayaben na empresa.

La xornada, pesi a la so duración, foi bien dinámica y entretenía. Empezó echando la vista atrás y poniendo en contestu a les dos persones más veteranes. Daqué que s’estimó dende’l públicu asistente más nuevu, que cavilgaba sobro la desconexón Interxeneracional y la falta de conocencia de la mocedá de persones qu’entá tienen enforma qu’apurrir y de les que pue deprendese enforma.

El percorríu siguió per amosanos de manera bien visual cómo fueron capaces d’entamase, entá escareciendo de too tipu de medios de comunicación, n’asamblees de trabayadores que llegaron n’ocasiones a enllenar espacios de tala magnitú como la plaza toros de Xixón.

Nun se focalizó namás na capacidá d’unos pocos pa convencer al restu de la necesidá de crear asamblees dende les bases de la pirámide, sinón que evidenció que’l papel de los sindicatos a la de traicionar a les sos bases nun ye daqué nuevo.

Adrián, que representaba un sector de los más precarios y atomizáu qu’esisten, el d’hostelería, visibilizó un conflictu bien recién como ye’l de los y el trabayadores del so sector, entamáu al marxe de los sindicatos, precisamente porque estos taben a puntu de roblar un conveniu a escondies de los trabayaores. Una organización que paez que vieno pa quedase porque pesi a que los sindicatos roblaren ensin el so consentimientu, esta plataforma consiguió caltenese viva mesmo perdiendo esta primer batalla, que nun asumen como’l fin de la guerra.

Ente relatu y relatu quedaba patente la necesidá de fomentar los conceyos como espacios d’unidá y dende los qu’al traviés de los alderiques colectivos atopar fórmules de contestación énte los ataques carecios pola clas trabayadora.

Espacios como Asturies Insumisa, que llogró la reconocencia de los dos ponentes más veteranos como un espaciu que pretende afaese a los tiempos que cuerren y que pesi a la so recién creación yá cunta con un bon cabás d’esperiencia a los costazos de toles plataformes y colectivos que participen d’él.

Asturies Insumisa, pa quien entá nun la conocen, ye una asamblea que ta construyida por un gran númberu de persones pertenecientes a múltiples organizaciones de toa índole, venceyaes a la llucha obrera de toa Asturies. Ye un espaciu abiertu onde cualquier persona o colectivu d’Esquierdes Asturianu pue participar en busca d’un oxetivu común.

Nesta primer etapa, como bien dexaron nidio na primer de les xornaes d’sti mes d’abril, l’oxetivu nun ye otru qu’afitar un espaciu xunitariu que texa redes pa dar respuesta a los ataques que la clas trabayadora ta careciendo.

Anunciaben que yera necesariu dexar a un llau los desalcuentros y analizar de forma colectiva los males reinales pa trazar una estratexa y buscar fórmules visibilizaores que llamen a la movilización.

Finalmente, clausuraben l’actu reconociéndolu como l’entamu de daqué que ta por construyir ente toos y toes y qu’apunta a convertise nesi espaciu qu’espierte la ilusión y reactive a toa esa militancia que paez adurmía, pero non muerta.

La prósima charra d’esti abril insumisu tien el suxerente títulu “Política social y miseria” y tendrá llugar el miércoles 5 a les 19:00 na Llibrería La Llocura, en Mieres

This work is licensed under a Creative Commons Attribution 4.0 International License.