Asturies faese povisa pente la chiflaura d’unos y la dexadez d’otros

30 Marzu, 2023

97 incendios en 33 conceyos Un horru recién iguáu y una fonte de más de dos sieglos foron víctimes, xunto con miles de vides animales y vexetales, de la chiflaura d’unos y la dexadez d’otros. Falten medios p’amatar incendios, falten medios pa prindar a los culpables, pero perriba de tou, falta enfotu por protexer Asturies

“Ta quemando too pente Les Cuerries y El Peruyeru, tamién perriba Ques, y l’aire tira pa equí. Tamién hai otru fueu pa Vegarrionda. Por Puente Miera nun se pué pasar, el fueu pasó la carretera. El que metio chisqueru güei, luciose”. Esa llamada de socorru circulaba ayeri pela mañana; a les doce la nueche los vecinos de Bierces, un de los munchos pueblos de Piloña onde’l fuéu averaba a les cases, seguíen solos faciendo por amatar el fuéu, nun hai efeutivos, la situación ye llaceriosa. Con tres bomberos por parque, si tan en Ques nun pueden tar en Bierces y dicen a los vecinos que si baxa más el fueu, que llamen al 112, a ver si hai suerte.

Ayeri amburó tamién la Peña los Cuatro Xueces, y d’Allande aporten grabaciones de cases ardiendo. Una veintena de vecinos de Aristébanu y Cabornu (Valdés) foron desaloxaos esti riscar, los sos llares tamién desaniciaos pel fuéu. Asina fasta 97 incendios al mesmu tiempu, repartios per 33 conceyos. Tovía güei Asturies ye un puntu encarnáu nel mapa d’incendios en tiempu real. L’indiz de riesgu de nuevos incendios ta pente peraltu y estremu en toa Asturies güei.

Nos llabores d’estinción a los escasísimos Bomberos el SEPA y a los propios vecinos tuvieron de xunise dellos ganaeros, que se movilizaron per Asturies con cisternes propies pa collaborar, la Brigada de Refuerzu d’Incendios Forestales (BRIF) de Tinéu, Brigaes de Llabores Preventives ( BLPS) del Ministeriu pa la Transición Ecolóxica, la Guardería de Mediu Natural, asina comu Guardia Civil, empreses forestales, agrupaciones de voluntarios de Protección Civil, militares y personal municipal. Tou ello nun ta siendo abondo. L’abondancia d’ocalitos alimenta les llapiaes en munches fasteres, los voluntarios nun algamen cuando nun hai medios y los focos continúen apaeciendo ensin que naide s’esmoleza por detener a los pirómanos que, presumiblemente, tan prendiendo los fueos.