Cuatro editoriales participen fasta agora nesti proyeutu qu’ufre por agora 29 títulos n’asturianu

Si la llectura ye imprescindible p’afondar nuna llingua, tamién ye cierto qu’anguañu la dixitalización y la presencia en dispositivos lletrónicos ye’l meyor camín p’aportar a la población, especialmente a la más moza. nubecuentos.com ye una biblioteca online pa ver, lleer y sentir álbumes illustraos  pa la reciella,  dende cualquier tipu de dispositivu, qu’aconceya fasta agora obres de cuatro sellos editoriales asturianos: Impronta Editorial / Ediciones Trabe / Delallama Editorial y Pintar-Pintar, anque tienen la intención de siguir amiestando editoriales a la so disponibilidá.

Pol intre más del cuarenta por cientu de les obres de la biblioteca tan n’asturianu, pero la cifra va medrando, siendo por agora 29 llibros nesta llingua a los que pue acedese al traviés de la soscrición a la páxina, que tien un coste de 7’99 € al mes (o 84€ añales) y que permite tamién utilizar la so biblioteca en castellán. En nubecuentos.com podemos alcontrar clásicos comu’l Coríu féu, Los tres gochinos y el llobu o El soldaín de plomu, pero tamién obra nuevo comu Pallabres pa Martín, Versonaxes o El misteriu de Xulia.

Dende Pintar-pintar camienten qu’esti pue ser un bon recursu en xeneral pa biblioteques, centros educativos, llibreríes, organizaciones, etc, y en particular pal profesoráu d’asturianu, pa compartir llectures, amás de coles ediciones impreses, nes pizarres dixitales, salones d’actos, ordenadores etc.

Alberto Rodríguez

This work is licensed under a Creative Commons Attribution 4.0 International License.