Los del Molinón conocieron la victoria namás una vegada nos caberos siete partíos de lliga, y los azulones precisaron ocho alcuentros pa consiguir los trés puntos
Dambes aficiones, tan fieles comu siempres, vieron a los sos equipos cayer na tabla mientres la temporada, y pocos consiguen desplicase que yos pasa a estos equipos. Nel casu del Uviéu falamos d’un problema d’adautación de la plantiya, ensin dulda tantes llegaes y cesiones foron dañibles pa una plantiya que cunta con munchos activos nuevos y amás munchos de los sos xugadores van tornar al so club a la fin de la temporada.
El casu del Sporting ye bastante estremáu, los de Mareo cunten con una plantiya muncho más fuerte y asitiada que los de la capital, pero según el parte médicu del club el pasáu 13 de Marzu, ocho futbolistes de la plantiya actual nun tán disponibles pa saltar al campu. Amás dalgunes de les estrelles del club atópense dientro d’esti grupu, como’l delanteru serbiu Djurdjevic o l’atacante brasileñu Junior. EL primeru ye amás un de los mayores culpables del baxón de rendimientu del club, una y bones esta temporada ta rindiendo bien perbaxo lo esperao.
Volviendo al Tartiere, el técnicu de los d’Uviéu foi claru “cuando nun ye un costazu ye una gastrointeritis” declaró n’una rueda de prensa, y ye que les mancadures escorrieron a los de Cervera mientres el cursu cuasi tantu como a los entrenaos por Miguel Ángel Ramírez. De fechu solo 9 futbolistes de la plantiya salvaron de les mancadures no que llevamos de temporada.
Dambos equipos sumen 36 puntos, y namás dos goles de diferencia ponen al Sporting per delantre’l so rival, ocupen la decimoctava y la decimoséptima posición y darréu detrás de so la Ponferradina llidera’l descensu de la categoría con 30 puntos, a namás dos victories de comese a dalgún de los asturianos. Eso si, al equipu Lleonés l’Uviéu sáca-y 8 ya’l Sporting 10, asina que en casu d’empate a puntos, cualesquier de los nuesos equipos tien les de ganar pa caltenese na categoría.
Nel Dos Santos
This work is licensed under a Creative Commons Attribution 4.0 International License.
