• Portada
  • >
  • Visto nes redes
  • >
  • Raquel L. Murias la cabezalera de SOS Occidente/EV pertenez al gobiernu de Barbón

Raquel L. Murias la cabezalera de SOS Occidente/EV pertenez al gobiernu de Barbón

  • 20 Marzu, 2023

“Nel Suroccidente d’Asturies surdió un movimientu denomináu SOS Occidente. Un proyectu llimpiu, puru y claro, qu’acabó prostituyéndose y perdió la so esencia orixinaria”

“España Vaciada (EV) ye simple y llanamente una marca blanca del PSOE”

Del Blog Hirviente Resoplido

Nes caberes décades, munches villes, pueblos y aldegues de la España rural esperimentaron unu amenorgamientu significativu de la población. Los sos habitantes treslladáronse a árees urbanes en busca de meyores oportunidaes llaborales, un mayor nivel de vida o a cencielles los pas xubilaos acompañen equivocadamente al so fíos por qu’estudien o trabayen. Fenómenu, esti postreru más modernu, que ye’l cuelmu de los prestes. Non solo los mozos, sinón tamién como nel casu peculiar d’Asturies, los prexubilaos de la minería emigraron de los sos antiguos llugares de nacencia y residencia onde se prexubilaren. En Cataluña pretendieron obligar a estes clases pasives, a permanecer nos sos llugares orixinarios de residencia onde trabayaron, pa que nun emigraren a otres localidaes abasnando asina, non solo a una familia entera sinón tamién a una importante renta familiar; non solo despoblando sinón tamién descapitalizando’l conceyu onde trabayara y prexubilara.

Seya que non, la despoblación y avieyamientu nes zones rurales, la falta d’actividá económica, servicios, infracadarmes o a cencielles la falta d’una voluntá firme de favorecer a eses zones con politiques actives de creación d’emplegu, fiscalidá diferencial y servicios, prevocó qu’abondes árees rurales agora tean llevantándose’n llucha.

Por una fiscalidá más xusta, nun puede pagase lo mesmo onde hai menos servicios, la escasez d’atención médica, el deficiente bientar social pa una población ca vuelta más avieyada ya infracadarmes tercemundistes (falta de fibra, conexones telemátiques, carreteres escarcavonaes, víes ferrees ensin trenes, falta d’autovíes etc). Total desidia nel caltenimientu de les infracadarmes esistentes, porque les nueves son una quimera que nin les verán. Delles soluciones propuestes inclúin invertir en servicios rurales en paridá colos urbanos, promover l’emprendimientu, la creación d’emplegu y afalar a la mocedá a quedase nes sos comunidaes ufiertando incentivos fiscales, subsidios a la compra y arriendu de vivienda etc…

Nel Suroccidente d’Asturies surdió un movimientu denomináu SOS Occidente. Un proyectu llimpiu, puru y claro, qu’acabó prostituyéndose y perdió la so esencia orixinaria. El canguetu Marcos Verano, que foi unu de los sos impulsores, acabó abandonando’l barcu pola numberoses inxerencies esternes. A Marcos Verano, que nun ye un home manipulable, foi arrequexándose-y como a un elementu cafiante, hasta que decidió dar la portada y dio l’adiós hasta nunca enxamás. Vamos que coló asquiáu. La esplosión que provocó la so dimisión o siquier lo que prendió la mecha, foi l’absorción de SOS Occidente (SOS) pola formación política de España Vaciada (EV). Y lo peor de too, en cuenta de na, nun van apurrir nin un euru, nin tampoco sofitu lloxísticu nin siquiamente nueva savia.

España Vaciada (EV) ye simple y llanamente una marca blanca del PSOE. N’Asturies la Federación Socialista Asturiana (FSA) ye una federación teóricámente independiente de la franquicia PSOE. Los socialistes ástures nunca presumieron d’ello, de ser una federación del partíu socialista, sinón al contrariu siempres l’ocultaren. Quiciabes por esi acomplexamientu xeneralizáu que carez una parte de la sociedá asturiana, que siempres escuende lo propio, la so identidá, el so calter autóctonu, so la corexa. Anque paez que l’actual secretariu xeneral, Adrián Barbón, ta empezando a tatexar cola cara más autonomista de la federación, dempués de 40 años de socialismu vergoñante, cosmopaleto, internacionalista y, sobro manera, surcursalista de Madrid. Pel intre son too apariencies, puru postureu ximelgando la bandera d’Asturies, pero too bien tibio, ensin la valentía abonda pa salir del armariu.


This work is licensed under a Creative Commons Attribution 4.0 International License.

1 Comment Already

  1. Es una pena lo de este partido. Porque están huérfanos del suroccidente. Realmente han centrado todo en el noroccidente. Se han olvidado de que por ejemplo Cangas es el municipio más poblado de occidente y por aquí empieza a haber desafección con el partido porque se les ve muy centrado hacia el noroccidente

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies