• Portada
  • >
  • Política
  • >
  • Andecha Astur anuncia nel so Conceyu Nacional la so intención de presentase a les elleiciones cola so propuesta de Frente Común

Andecha Astur anuncia nel so Conceyu Nacional la so intención de presentase a les elleiciones cola so propuesta de Frente Común

  • 20 Marzu, 2023

El Conceyu Nacional d’Andecha Astur aprebó caltener la propuesta de Frente Común y llistes abiertes en candidatures onde poder integrase de forma independiente, proponiendo consensuar los programes elleutorales

Andecha Astur cellebró esti fin de selmana un Conceyu Nacional nel que los sos miembros alcordaron caltener la propuesta de Frente Común Asturianu, ufriendo a persones independientes y colleutivos la posibilidá de collaborar y presentase’n llistes abiertes onde esista la posibilidá d’integrase comu independientes. 

Dientro esi espíritu integraos, comprometiéronse a posibilitar la participación nel desendolcu de los programes elleutorales, consensuando los mesmos a partir d’unes llinies básiques comunes. Asina mesmo declaren la so intención de dar prioridá  a les presones con más capacidá integraora, ensin tener en consideranza la so militancia o non d’éstes na organización, dándose plena soberanía a los conceyos pa la ellaboración de les sos llistes, y dellegando na Xunta Executiva l’aprebación de les candidatures nacionales.

Nel comunicáu qu’espublicen de magar el Conceyu Nacional aporfien en que nes actuales circustancies la propuesta de Frente Común tien más xacíu que nunca. “Y ello porque tamos comencíos de que namás ye posible avanzar xunciendo fuercies ente les presones y organizaciones que creyemos que les persones que vivimos n’Asturies tenemos drechu a decidir cuanto afeuta al nuesu futuru, y que defendemos una necesaria tresformación social imparable que garantice la reconcencia los nuesos drechos y llibertaes presonales y colleutives”.

Col oxetu de llevar allantre estos alcuerdos costituyóse formalmente una Estaya Elleutoral qu’entamará’l so llabor darréu.

Pente los munchos alcuerdos algamaos nel Conceyu Nacional, destaquen la necesidá d’afayar más el discursu del partíu a les rialidaes cercanes de la ciudadanía y la clas trabayaora, apurriendo soluciones práutiques a los problemes concretos. Nesi sen valoróse de forma perpositiva’l trabayu que vienen faciendo nos caberos tiempos de participar activamente nos estremaos movimientos sociales y nes rempuestes a los conflictos llaborales.

Otru de los temes trataos nel Conceyu Nacional foi el de la situación de la mocedá asturiana y del mundiu rural, especialmente de les fasteres oriental y ocidental asturiana, cuestiones sobre les que’l Conceyu Nacional aprebó un marcu estratéxicu d’alternatives qu’incorporarán al so programa elleutoral.

Redaición InfoAsturies


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies