El Principado trata d’utilizar la vieya táutica pa finar colos conflictos llaborales: mercar con perres a los trabayaores. Furruló na minería y furruló na Naval, pente otros, pero nel casu los sanitarios ye una cuestión de concenxa: nun van aceutar un sobornu qu’implica  afitar el desaniciu de la Sanidá Pública Asturiana

La Plataforma SOS Trabayadores Sespa nun almite que se-yos merque con parches económicos mientres se sigue desmantelando la sanidá pública, polo que convoquen un manifestamientu’n defensa de los sos drechos y los de los pacientes el prósimu 25 de marzu, en Xixón.

El principiu d’alcuerdu algamáu ente’l Serviciu de Salú del Principáu d’Asturies (Sespa) y la mayoría de los sindicatos de la mesa de negociación p’ameyorar les condiciones llaborales de les distinta categoríes llaborales nel ámbitu sanitariu rexonal, pindiu de ratificar, ciéntrase na medría salarial de los actuales  19.000 trabayadores de la sanidá pública asturiana.

El preacuerdu foi apautáu polos sindicatos CCOO, UXT, CSIF y Cemsatse, cola oposición de Sicepa/Usipa y consiste nun incrementu de les guardias y un aumentu nos complementos básicu y de nuechirnidá. Sicasí, anque dende la Plataforma de trabayadores consideren importante recuperar los drechos llaborales perdíos, afirmen que non tou se soluciona a golpe de chequera y nuna amuesa de dignidá desixen una visión al llargu plazu y una meyora real del sistema públicu de salú asturianu “Nun tamos dimpuestos a aceutar midíes aisllaes que nun enfrenten los problemes estructurales del sistema”, añeden nun comunicáu.

Poro piden la participación de los pacientes y  trabayadores sanitarios nel manifestamientu que convoquen pal 25 de marzu en Xixón, en defensa de los derechos de los pacientes y trabayadores de la Sanidá Pública. La cita ye a les 17:30 na Plaza San Miguel.

Alberto Rodríguez