Vienres 10 de Marzu, 2.023

@eltiempunasturies

Bonos díes, bona xente.

Alborecemos con nubes ya claros ya con unes temperatures que tan alrodiu de los 13ºC, rexistrándose nel puirtu Payares 5,6ºC, amás soplan raches fuertes de vientu ábrigu nes zones altes ya en puntos del llitoral.

Güei vamos tener el cielu empuercáu de nubes medies y altes entemecides ente grandes claros con raches fuertes de vientu ábrigu nel llitoral y cordelera, amás les temperatures van subir bultablemente con másimes que pue averase a los 25ºC.

Mañana sábadu l’aire va tender a ser gallegu refrescando dalgo’l día, amás mos empobinará nubosidá abondosa que vendrá acompangada de precipitaciones febles ya disperses más probables ya frecuentes na fastera surocidental y cordelera.

El domingu amenorgará l’aire quedando sele ya variable, nel cielu tendremos nubes ya claros y les temperatures vuelven a subir perriba de los 20ºC.

Paez que la selmana entrante, sobre too de cara al martes van normalizase les temperatures con un descensu moderáu que vendrá acompangáu de precipitaciones, muncho vientu y dalgo de nieve pela cordelera, pero esto yá lu diremos viendo.

Que paséis un bon fin de selmana collacies ya collacios.

Semeya del pasáu sábadu en Piedraxueves, camín real de la Mesa