El Dilema de Xixón y La Traviesa de L’Infiestu acueyen los conciertos d’esta banda que fai regaetton, punk, rap y muncho más
Dupla ye un grupu de música urbana fecha nun entornu rural. Beñat Oribe (batería) y Gari Uriart (guitarra y voz) son del pueblu alavés d’Agurain -como La Polla Records y Kaotiko- y reflexen el sentir d’una mocedá alloñada d’etiquetes, de prexuicios y de purismos. Por eso faen reggaeton y punk; rap y folk; electrónica y rock; falen de fiesta y de llucha… too ello con un tastu pop nun directu que ye un españíu d’enerxía, actitú, diversión y desenfadu.
Entamaron en 2020; l’añu pasáu dieron el pelotazu con más de 50 conciertos en 9 meses; tienen un disco y dellos singles; con ellos collaboraron l’actriz y cantante Itziar Ituño (La Casa de Papel), los trikitilaris Joseba Tapia y Xabier Leturia, y míticos de la escena como Panxo ZOO, Juantxo Glaukoma, Pello Skakeitan o Evaristo Páramos.
Esti fin de selmana van actuar n’Asturies per primer vez de la mano d’Ixuxú Cultura, una promotora especializada en música fecha en llingües minorizaes que recupera la so actividá dempués de 5 años de parón. Los sos conciertos van ser el vienres 10 a les 21h nel Dilema Indie Club de Xixón y el sábadu 11 en La Traviesa de L’Infiestu. Toos ellos con entrada llibre pa que’l públicu asturianu puea disfrutar del directu d’una de las bandas más punteras de la nueva música euskaldun.
Alberto Rodríguez
This work is licensed under a Creative Commons Attribution 4.0 International License.
