Bonos díes, bona xente.

Alborecemos col cielu poco nuboso o escampláu ya con unes temperatures que tan alrodiu de los 3-4ºC, rexistrándose nel puirtu Payares -0,4ºC.

Güei va dir aumentando la nubosidá hasta dexanos el cielu nuble con unes temperatures que tovía van camudar poco, siguiendo l’aire sele ya variable.

Mañana martes la llegada de vientu ábrigu qu’amás va soplar con fuercia nes zones altes ya en puntos de la costa, va facer que asciendan les temperatures moderadamente y yá nun tengamos xelaes. El cielu va caltenese nuboso con dalguna precipitación feble na cordelera y fastera más surocidental d’Asturies onde la nubosidá sedrá más abondosa.

El miércoles vamos seguir con raches mui fuertes de vientu ábrigu que dixebrarán les nubes na fastera central ya oriental, calteniéndose nubosidá de retención na cara sur de la cordelera y surocidente asturianu con unes temperatures que siguen en moderáu ascensu.

El xueves seguimos con muncho vientu ábrigu que pue algamar los 80km/h nes zones altes ya en puntos del llitoral y nel cielu vamos seguir con grandes claros na mayor parte d’Asturies, tando más nubosu, como ye vezu, na fastera surocidental y cordelera.

La fin de selmana seguiremos col cielu empuercáu de nubes medies y altes entemecies ente dellos claros, con muncho vientu ábrigu y temperatures primavarales con másimes que puen rondar los 25ºC.