Bonos díes, bona xente.

Alborecemos col cielu parcialmente nuboso na metá norte d’Asturies , tando escampláu na cordelera y fastera surocidental con unes temperatures que tan alrodiu de los 2ºC, rexistrándose nel puirtu Payares -4,4ºC, destacando los -18,8ºC de la Vega de Lliordes en Picos d’Europa.

Güei vamos tener el cielu poco nuboso en xeneral, sicasí a primeres ya últimes hores surdirán intervalos de nubes baxes na metá norte d’Asturies tando nel restu completamente escampláu con unes temperatures que camudarán poco, calteniéndose un ambiente fríu en xeneral, amás l’aire nordés pue soplar dalgo molestu na costa nes hores centrales del día.

Mañana sábadu tendremos menos nubes y subirán llixeramente les temperatures , seguiremos con dalgo de nordés pela costa tando l’aire nel restu sele ya variable, y el domingu tendremos dalguna nube más, subirán un poquiñín les temperatures y l’aire va quedar sele ya variable.

La selmana viniente vamos tener el tiempu dalgo más revueltu pero con unes temperatures yá muncho más suaves por mor del vientu ábrigu qu’entamará a soplar empobináu por una descarga fría que va dir a parar al atlánticu , formando borrasques ya empobinandonos vientu ábrigu.

N’esti mapa de previsión del modelu canadiense GEM vese perfeutamente como la descarga fría se tirá al atlánticu, formando borrasques sobre él ya empobinandos vientu templáu ya húmedo sobre la península Ibérica.

Que paséis una bona fin de selmana collacies ya collacios ya esfrutar del monte con precuru porque va tar espectacular