A1 invazion, el nuevu colectivu de hip hop n’Asturies

3 Marzu, 2023

Falamos con Sly N d’A1 invazion. “Dexamos amor, coraes y pasión nesto.”

¿Quién sois?, falanos un pocu más de ti y de los miembros del colectivu

– A1 Invazion ye un colectivu que naz en 2022 que conformen múltiples integrantes, non yá raperos, tamién productores y amigos de la disciplina audiovisual.

¿Como decidistis montar A1 invazion? ¿Quién tuvo la idea?

– Podría dicise qu’A1 ye un Cerberu, un perru de 3 cabeces, estes seríen Arte Kills, Zote y Stxners Music. A1 naz d’una “necesidá”, de querer da-y una verdadera forma, personalidá ya identidá afigurada na música que faemos como grupu, yá que pongo la mano nel fueu de que la mayoría de los que formamos parte d’esto que llevamos invirtiendo un tiempu considerable y siguío nesta música, fantasiemos con tener un grupu y les vegaes que s’intentó conformar un xunte para faer daqué seriu, nunca salió alantre por un motivu o otru.

Entrando en fondura,¿L’oxetivu del proyectu, cual ye?

– Nun veo qu’haiga un oxetivu determináu y aparentemente claru, a cencielles queremos amosar al mundu que ye lo que faemos, que ye’l Hip-Hop pa nós, o meyor dicho, que son la música y l’arte pa nós y de que forma llevalo acabo, poniendo tol nuesu amor, coraes y pasión nesto. Nun hai metes impuestes, polo que nun hai llimitaciones, cuando llegues a una meta, el camín acábase y nós tenemos demasiaos llitros de creatividá y motivación comu pa pensar en qu’esto puea acabase, anque’n cualquier momentu, espero bien alloñáu, esi día probablemente llegue, siendo realistes. Lo bono del colectivu ye que ca ún tien la so personalidá como humanu y como artista, distintes idegues y conceiciones de les coses, a pesar de cimblar nuna mesma sintonía, naide piensa igual que l’otru al 100%, esto nun ye un robot, ye una bisarma de 25 cabeces

¿Que futuru-y ves al colectivu d’equí a unos años?

– Nun sabría dicite, yá que mientres estos años yo y gran parte de los mios compañeros pudimos comprobar y conrrobar que la vida ponte nunes circunstancies ya unes tesitures que non siempres ves venir, porque non tou depende d’ún mesmu siempres, el mundu sigue xirando y nun pues pretender quedate paráu na to burbuya del rap por bien idílicu que pueda aportar, si nun quies acabar podreciendo, pero confío en que por motivación, ambición y ganes, podamos dicir qu’esto acaba d’entamar y quédanos demasiao por brindar a la esfera

Esti pasáu 20 de xineru espublizasteis un cypher nel qu’apaecen Flick o Mirko entre otros, cúntanos, ¿quiénes sosprendieron más?

– Esactu, bonu realmente esti ye’l segundu capítulu del cypher, el primeru salió la selmana anterior, podéis atopalo, al igual qu’esti, na canal d’A1 INVAZION. Cómo anantes dixi, siento que ca un tien una personalidá artística bien propia y marcada y que nengún de nós rapea igual qu’otru, ca un apurre’l so eslabón para formar la cadena más rellumante y pesada que vos podais atopar nel underground d’esti país. Siento que tamos recibiendo más sofitu del que recibimos estos pasaos meses, les coses tán faciéndose bien y la rueda paez qu’adulces va xirando, pero entá queda enforma camín per delantre, mientres siguimos abriendo por que se reconoza’l trabayu bien fechu nel 33, equí, n’España, nel otru llau del charcu y prácticamente allá onde seya que nos punxeren el güeyu

Allonxando un mizcu del coleutivu, entrando más na to carrera, falanos un pocu del to futuru ¿Que trabayos podemos esperar de Sly N en 2023?¿Hai dalguna fecha de llanzamientu nos próximos díes?

– Estos últimos meses tuvieron apinaos de conciertos y de nueves esperiencies, teo muncha música acumulao d’esti pasáu 2022, enforma, tanta como pa sacar una tema ca selmana y completar el calendariu d’equí a fin d’añu ensin nengún tipu de problema. Estos pasaos díes salió una tema bien especial, col mio hermanu Flick. Lo prósimo que pueo anunciar ye un EP con una guapa hestoria tres del procesu, con rapeos íntegros d’un servidor, ensin collaboraciones, y que ta producíu y backeau al 100% por Arte Kills, nun se una fecha fixa pero va ser el prósimu proyectu “non single” que salga a la lluz. Amás d’esto van salir un montón de collaboraciones d’estos meses y dellos proyectos xunto con más peña implicada

Dinos agora Nachu, ¿Qu’artista ye’l to apueste para crecer más allá de Asturies en 2023?

– Sinceramente primero de too apuestu polo mio, apuesto pol mio grupu y pola mio redolada, polo xeneral, espero que sigamos moviendo y faciendo les coses comu tamos faciéndoles. Ca vegada hai mas mines d’oru ocultu n’Asturies que tán saliendo adulces, somos una escena bien remocicada comparándola con años atrás, eso trai pros y contras como tou, pero confío en que se tán empezando a facer les coses con amor de verdá per parte de varia xente y que col enfotu del procesu, va empezar a valorar al 33 como una tierra rellumante.

Pa terminar, gustaríanos que dieres un mensaxe pa los MC’s que tán entamando y que pidas un deseyu pa A1 invazion en 2023

– Considero que nun soi naide para dar conseyos nin mensaxes que vaigan calar, nun soi Tupac nin na pol estilu, a cencielles que s’enfoten n’analizar lo que tán faciendo y ser conscientes de lo que tán faciendo en tou momentu, que nun se-yos vaiga na de les manes por volvese “raperos”, si nun acoriques la to obra, ye imposible convertila nun productu valible tanto para ti como para la industria. Los deseyos nunca se dicen n’alto hehehehee…

Nel Dos Santos