Presentación oficial del vídeu del 8º principiu de la Xixonomía: “l’área d’un cachopu ye igual a base por altura, partíu por dos”

Nun va muncho, un grupu collacios y collacies de Xixón axuntáronse pa compartir les sos mayores aficiones: la música, les scooters y les fartures. El so platu preferíu ye’l cachopu, anque maticen: “nun dexamos pasar un bon platu d’arroz con bugre”. Asina nació’l Scooter Club Cachopers.

D’ellos va’l nuevu episodiu de la Xixonomía, la ciencia del vivir bien. Ye’l correspondiente al principiu ochavu de la Xixonomía: “l’área d’un cachopu ye igual a base por altura, partíu por dos”. 

La campaña, que pon en valor a les persones, l’aspeutu meyor valoráu polos y les turistes que visiten Xixón, centra esta vegada’l focu na gastronomía, la contorna, la escena musical y el bon rollu de la ciudá asturiana. Sobre les sos vespes, Ana, Pablo y los sos collacios y collacies xúntense onde la estatua de Pelayu, percuerren el Muru de la sablera de San Llorienzu y, al traviés de les carreteres reviraes del conceyu, lleguen a la sablera d’Estaño. Ellí, cómo non, comparten un buen cachopu con vistes y zarren el día con buena música en vivo de la escena llocal. “En Xixón comemos bien y comemos asgaya, pero lo que más nos presta ye compartilo”, aseguren.

Esta pieza creativa va ser la que Visita Xixón emplegue na so campaña nueva de publicidá, que tien como envís xenerar un gran impautu, sobre manera, en Madrid, principal mercáu emisor de turistes a Xixón. La campaña de publicidá, qu’escomencipiará en marzu, va emplegar plataformes de TV online, diarios dixitales y otres webs de conteníos venceyaos col viaxe y la gastronomía, redes sociales, revistes y suplementos de viaxes y d’estilu vida y soportes espectaculares d’esterior, como les entraes de los intercambiadores, buses integrales o los mercaos gastronómicos de la capital española.

Arriendes de la publicidá direuta, la campaña va completase con un eventu n’abril empobináu a creadores de conteníu y nel que se va celebrar la final del I Concursu de Cachopos #Cachopomía. Tamién Visita Xixón va presentar la Xixonomía nel Salón de Turismu de París, en marzu, y na feria Expovacaciones, en Bilbao, en mayu.

This work is licensed under a Creative Commons Attribution 4.0 International License.