La media añal percibía polos que reciben un sofitu d’urxencia ye de 1007 €, ello ye, unos 83 € al mes, frente a los cerca de 6.000 € mensuales que cobra nel mesmu periodu el presidente d’Asturies
Los caberos datos del INE indiquen qu’un total de 58.684 asturianos viven perbaxu l’esmucir de la prubitú severa, cuasi un 6%. Ello implica cuestiones comu que nun pueden permitise comer carne, pitu o pexe polo menos tres dies per selmana, nun pue calecer la so vivienda o carez d’ella, tien retrasos en pagos y ta imposibilitáu p’afrontar gastos imprevistos.
D’ellos perciben aides 14.494, ello ye, el 24’7% de los que les necesiten, la metá de la media estatal, que ta nos 47’7%. Tampocu ye qu’ello marque muncho la diferencia, ya que ca una d’estes persones percibe, de media, 1007,28 euros al añu colos que se supón que tienen que salir d’esa carencia severa.
En total dedicáronse a esti fin un total de 14.599.459 €. lo que vien a ser unos 14 euros por asturianu. El sueldu añal del presidente d’Asturies asciende a 69.128,62 €, ello ye, que l’añu pasáu Adrián Barbón cobró cuasi cinco vegaes lo que cobraron en total esos 14.494 asturianos, ensin escaecer a los 44.190 que nun perciben res.
Redaición InfoAsturies
This work is licensed under a Creative Commons Attribution 4.0 International License.
