Andecha Astur amuesa la so solidaridá pa col vecindariu afeutáu por esta llaceria de planificación y execución de les obres y proponen al Gobiernu asturianu qu’acuda a Asturies la Ministra Tresportes y entamen dambes alministraciones el diseñu d’un Plan Estratéxicu del Tresporte ferroviariu n’Asturies, qu’incluya l’apertura negociaciones pa que’l Gobiernu asturianu puea asumir n’esclusiva tresferencies efeutives nesta materia
La llinia Xixón Llaviana lleva seyes meses ensin furrular (con autobuses faciendo la cabera parte’l trayeutu y allargando los tiempos de percorríu a llímites inasumibles polos usuarios) y queden otros cuatro meses polo menos nes mesmes circustancies, siendo ello que se cortó’l tramu Llaviana-El Berrón del 1/9/2022 al 15/3/2023 ya’l tramu El Berrón-Xixón parcialmente del 1/9/2022 al 15/6/2023.
El retrasu y sobrecoste les obres agrávase porque dende Adif envaloró mal les obres necesaries, nun se dotó a los trabayaores colos materiales necesarios pa continuar coles obres ensin paraes, nin coles midíes de seguranza afayaices, permitiendo asina que se-y causen daños y se roben materiales envaloraos en 170.000 €. Amás, recalquen dende A. A., les obres tán inorando la necesidá y el compromisu de soterrar les víes al so pasu per Llangréu.
Remembramos qu‘Andecha Astur ye l’únicu partíu que presentó entrugues nel Congresu al Gobiernu español pola crisis de los trenes XXL de l’antigua FEVE, porque considera que’l ferrocarril, y en concreto’l proyeutu l’Asturtren, tien de ser l’exe de la política de tresportes públicos n’Asturies.
Redaición InfoAsturies
This work is licensed under a Creative Commons Attribution 4.0 International License.
